1. Home
  2. Political
  3. વિરોધ બાદ હવે કેન્દ્ર સરકાર રોસ્ટર સિસ્ટમ પર બિલ અથવા વટહુકમ લાવવા તૈયાર
વિરોધ બાદ હવે કેન્દ્ર સરકાર રોસ્ટર સિસ્ટમ પર બિલ અથવા વટહુકમ લાવવા તૈયાર

વિરોધ બાદ હવે કેન્દ્ર સરકાર રોસ્ટર સિસ્ટમ પર બિલ અથવા વટહુકમ લાવવા તૈયાર

0

બજેટ સત્ર દરમિયાન શુક્રવારે માનવ સંસાધન વિકાસ પ્રધાન પ્રકાશ જાવડેકરે રાજ્યસભામાં કહ્યુ છે કે યુનિવર્સિટીઓની નિમણૂકોમાં અનામત સંદર્ભે રોસ્ટર સિસ્ટમથી અનુસૂચિત જાતિ, અનુસૂચિત જનજાતિ અને પછાત વર્ગ એટલે કે ઓબીસી અનામત પર કોઈ અસર પડવા દેવામાં આવશે નહીં. તેમણે ક્હ્યુ છે કે જો કોર્ટમાંથી અરજી નામંજૂર પણ થશે, તો તેના સંદર્ભે સરકારે વટહુકમ અથવા બિલ લાવવાનો નિર્ણય કર્યો છે.

રાજ્યસભામાં આ મુદ્દા પર સમાજવાદી પાર્ટી, બીએસપી સહીતના ઘણાં વિપક્ષી દળોના હંગામાને કારણે ગત ત્રણ દિવસથી ચાલી રહેલા ગતિરોધ પર સરકારે પોતાનું વલણ સ્પષ્ટ કર્યું છે. કેન્દ્રીય માનવ સંસાધન વિકાસ પ્રધાન પ્રકાશ જાવડેકરે કહ્યુ છે કે અનામત સંદર્ભે રોસ્ટર સિસ્ટમ પર સુપ્રીમ કોર્ટમાં સરકાર પુનર્વિચારણા અરજી દાખલ કરશે. તેમણે કહ્યુ છે કે કોર્ટમાં જો આ અરજી નામંજૂર થશે, તો સરકાર તેના માટે વટહુકમ અથવા બિલ પણ લાવશે.
સપા, બસપા, આપ અને આરજેડીના સાંસદોએ ઉચ્ચ શૈક્ષણિક સંસ્થાઓમાં નિમણૂકોમાં અનામત સંદર્બે 13 પોઈન્ટ રોસ્ટરના સ્થાને 200 પોઈન્ટ રોસ્ટરને પાછો લેવા માટે વટહુકમ અથવા ખરડાની માગણી કરી છે. આ વિપક્ષી સાંસદોની દલીલ છે કે રોસ્ટર સિસ્ટમથી એસસી, એસટી અને ઓબીસી અનામત સમાપ્ત થઈ જશે.

કેન્દ્રીય શિક્ષણ પ્રધાન પ્રકાશ જાવડેકરે ગુરુવારે રાજ્યસભામાં આ મામલે નિવેદન આપ્યું હતું. તેમણે જણાવ્યુ હતુ કે અલ્હાબાદ હાઈકોર્ટના ચુકાદા પર લાગુ કરવામાં આવેલી 200 પોઈન્ટ રોસ્ટર સિસ્ટમ વિરુદ્ધ કેન્દ્ર સરકાર તરફથી સુપ્રીમ કોર્ટમાં દાખલ વિશેષ મંજૂરી માટેની અરજી નામંજૂર કરાયા બાદ સરકાર હવે પુનર્વિચારણા અરજી દાખલ કરશે.

વિપક્ષે સરકાર પર આરોપ લગાવ્યો છે કે તેણે કોર્ટમાં મજબૂતાઈથી પોતાનો પક્ષ રજૂ કર્યો નથી. વિપક્ષીદળોની માગણી છે કે જો સરકાર બે દિવસની અંદર સામાન્ય વર્ગને અનામત આપવા સાથે જોડાયેલું બિલ લાવી શકે છે, તો આ મુદ્દા પર બિલ અથવા વટહુકમ કેમ લાવી શકે નહીં? જાવડેકરે કહ્યુ છે કે સરકાર હંમેશા સામાજિક ન્યાયના પક્ષમાં છે, પુનર્વિચારણા અરજી નામંજૂર થવાની સ્થિતિમાં સરકારે વટહુકમ અથવા બિલ લાવવાનો નિર્ણય કર્યો છે.

કેન્દ્રીય પ્રધાન પ્રકાશ જાવડેકરે આ મામલામાં ન્યાયિક પ્રક્રિયા પૂર્ણ થવા સુધીમાં ઉચ્ચ શૈક્ષણિક સંસ્થાઓમાં નિમણૂક અથવા ભરતી પ્રક્રિયાને બંધ રાખવાનો પણ ભરોસો અપાવ્યો છે. વિપક્ષના આરોપોનો જવાબ આપતા જાવડેકરે અદાલતમાં ચર્ચાના દસ્તાવેજ પણ ગૃહના પટલ પર રજૂ કર્યા હતા.

જાવડેકરે કહ્યુ છે કે રોસ્ટર સિસ્ટમને યુનિવર્સિટીના સ્થાને વિભાગના આધારે લાગુ કરવાથી વિભિન્ન વર્ગોના અનામત પર પડનારી ખરાબ અસરનો સરકારે અભ્યાસ કરાવ્યો છે. જાવડેકરે કહ્યુ ચે કે તેમણે નવો અભ્યાસ કરાવ્યો છે. જેમાં લગભગ ત્રીસ યુનિવર્સિટીઓની હાલની વ્યવસ્થાનું વિશ્લેષણ કરીને એ જાણવાની કોશિશ કરવામાં આવી છે કે વિભાગવાર રોસ્ટર સિસ્ટમને લાગુ કરવા પર એસસી-એસટી અનામતને કેવી રીતે નુકસાન થશે?

કેવી રીતે બદલાઈ રોસ્ટર સિસ્ટમ ?

દેશની યુનિવર્સિટીઓમાં શિક્ષકોની નિમણૂક માટે પહેલા બસ્સો પોઈન્ટ રોસ્ટર હેઠળ અનામતની વ્યવસ્થા હતી. આ વ્યવસ્થા હેઠળ યુનિવર્સિટીને એક યુનિટ માનવામાં આવતી હતી. આમા એકથી બસ્સો પદ માટે 9.5 ટકા અનામત વર્ગ અને 50.5 ટકા બિન અનામત વર્ગના હિસાબથી ભરતીની વ્યવસ્થા હતી. યુનિવર્સિટીને એક યુનિટ માનવાથી તમામ વર્ગના ઉમેદવારોની ભાગીદારી સુનિશ્ચિત થઈ શકતી હતી.

નવા નિયમ એટલે કે 13 પોઈન્ટ રોસ્ટર હેઠળ યુનિવર્સિટીને યુનિટ માનવાના સ્થાને વિભાગને યુનિટ માનવામાં આવ્યું. તેમા પહેલું,બીજું, ત્રીજું પદ સામાન્ય વર્ગ માટે રાખવામાં આવ્યું છે. જ્યારે ચોથું પદ ઓભીસી, પાંચમું અને છઠ્ઠું પદ સામાન્ય વર્ગ માટે રાખવામાં આવ્યું છે. સાતમું પદ અનુસૂચિત જાતિ માટે, આઠમું પદ ઓબીસી, પછી નવમું, દશમું અને અગિયારમું પદ ફરીથી સામાન્ય વર્ગ માટે, બારમુ પદ ઓબીસી, 13મું પદ સામાન્ય માટે અને 14મું પદ અનુસૂચિત જાતિ માટે અનામત હશે. વિપક્ષનો આરોપ છે કે આ નવા રોસ્ટર હેઠળ એસસી-એસટી અને ઓબીસી અનામત પર ખરાબ અસર પડશે અને આ વર્ગના લોકો યુનિવર્સિટીમાં સ્થાન પ્રાપ્ત કરી શકશે નહીં.

LEAVE YOUR COMMENT