મહેસાણા, 24 મે, 2026 : Two killed in accident between car and bike હાઈવે પર અકસ્માતના બનાવો વધતા જાય છે. જેમાં વિજાપુરના મોતીપુરા પાસે કાર અને બાઈક વચ્ચે વધુ એક અકસ્માતનો બનાવ બન્યો છે. આ અકસ્માતમાં બે વ્યક્તિઓના ઘટનાસ્થળે જ કમકમાટીભર્યા મોત નિપજ્યા છે, જ્યારે કારમાં સવાર અન્ય પ્રવાસીઓને ગંભીર ઈજાઓ પહોંચતા સારવાર માટે હોસ્પિટલ ખસેડાયા છે.
મહેસાણા જિલ્લામાં વિજાપુરના મોતીપુરા ગામ પાસે એક પૂરઝડપે ધસી આવેલી કારે બે બાઇકને જોરદાર ટક્કર મારી હતી. આ ગમખ્વાર અકસ્માતમાં બન્ને બાઈક સવારના ઘટનાસ્થળે જ કમકમાટીભર્યા મોત નિપજ્યા છે. જ્યારે કારમાં સવાર અન્ય આઠ લોકોને ગંભીર ઇજાઓ પહોંચી છે.
અકસ્માતના બનાવની વિગત એવી છે કે, વિજાપુર તાલુકાના મોતીપુરા ગામ પાસેથી રાજસ્થાન તરફથી આવી રહેલી કારચાલકે અચાનક પોતાના વાહન પરથી કાબૂ ગુમાવી દીધો હતો. બેકાબૂ બનેલી કારે રસ્તા પરથી પસાર થઇ રહેલા એક બાઇક અને સ્કૂટરને અડફેટે લીધા હતા. આ અકસ્માત એટલો ગંભીર હતો કે કારની પ્રચંડ ટક્કર વાગતા જ બંને દ્વિચક્રી વાહનો રોડ પરથી ફંગોળાઈને સીધા બાજુના ખેતરમાં જઈ પડ્યા હતા. અકસ્માતને પગલે ઘટનાસ્થળે સ્થાનિક લોકોના ટોળેટોળા ઉમટ્યા હતા અને ભારે અફરાતફરીનો માહોલ સર્જાયો હતો. આ અકસ્માતમાં કારમાં સવાર આઠ મુસાફરોને પણ નાની-મોટી અને ગંભીર ઇજાઓ પહોંચી હતી. સ્થાનિક લોકોની મદદથી તમામ ઇજાગ્રસ્તોને તાત્કાલિક સારવાર અર્થે વિજાપુરની સિવિલ હોસ્પિટલ ખાતે ખસેડવામાં આવ્યા છે, જ્યાં હાલ તેમની સારવાર ચાલી રહી છે.
અકસ્માતના આ બનાવની જાણ થતાં જ વિજાપુર પોલીસનો કાફલો તાત્કાલિક ઘટનાસ્થળે દોડી આવ્યો હતો. પોલીસે બંને મૃતકોના શબને પોસ્ટમોર્ટમ (પીએમ) અર્થે હોસ્પિટલ ખસેડીને કાયદેસરની કાર્યવાહી હાથ ધરી છે. પ્રાથમિક તપાસમાં કારની અતિશય ઝડપ અને ચાલકની બેદરકારી જ અકસ્માતનું મુખ્ય કારણ હોવાનું અનુમાન લગાવવામાં આવી રહ્યું છે.