- ઓસ્ટ્રેલિયામાં સોનાના ખનન દરમિયાન ઉલ્કાથી બનેલું ક્રેટર મળ્યું
- આ ક્રેટર દુનિયાનું સૌથી મોટું ઉલ્કા ક્રેટર હોવાનો જીયોલોજીસ્ટની ટીમનો દાવો
- આ ઉલ્કા આશરે 10 કરોડ વર્ષ પહેલા પૃથ્વી પર પડી હોવાની સંભાવના
ઓસ્ટ્રેલિયા વિવિધ પ્રકારની અજાયબી ધરાવતો દેશ છે ત્યારે ઓસ્ટ્રેલિયામાં સોનાના ખનન દરમિયાન ઉલ્કાથી બનેલું ક્રેટર મળી આવ્યું છે. આ ક્રેટર દુનિયાના સૌથી મોટા ઉલ્કા ક્રેટરમાંથી એક હોઇ શકે છે તેવો જીયોલોજીસ્ટની ટીમનો દાવો છે. માનવામાં આવી રહ્યું છે કે, આ ઉલ્કા આશરે 10 કરોડ વર્ષ પહેલા પૃથ્વી પર પડી હશે.
પ્રાપ્ત અહેવાલ અનુસાર, ઉલ્કાપાતથી બનેલો ખાડો પશ્વિમ ઓસ્ટ્રેલિયાના ઓરા બાંદાના ગોલ્ડફિલ્ડ્સની નજીક છે. આશરે 5 કિમીના વિસ્તારમાં ફેલાયેલા આ ક્રેટરને ઇલેક્ટ્રોમેગ્નેટિક અને ગ્રેવિમેટિક મેપિંગની મદદથી શોધવામાં આવ્યો છે. જીયોલોજીસ્ટ ટીમનું નેતૃત્વ કરી રહેલા ડૉ. જેસન મેયર્સુનું કહેવું છે કે, જે એસ્ટેરોઇડથી આ ક્રેટર બન્યું છે તેનું કદ 100 મીટરની આસપાસ હશે. તેની સ્થિતિ અને ગાયબ થયેલા એલિમેન્ટ તથા કિનારે મળી આવેલી માટીના આધારે અંદાજો મેળવી શકાય છે કે, આ ક્રેટર 10 કરોડ વર્ષ પહેલાનો હશે.
તપાસમાં જે સેમ્પલ્સ મળ્યા હતા એ માત્ર ન્યૂક્લિયર બ્લાસ્ટ કે ઉલ્કાપાતથી પેદા થતાં ઘટકો હતા. ટેકનિકલી આ બાબત સાબિત થાય છે કે એસ્ટેરોઇડ આ જગ્યા પર પડ્યું હશે. સોના સાથે આ ઘટનાને કોઇ સંબંધ નથી, પરંતુ ઉલ્કાપાતની આ ઘટનાને લીધે સોનું આસપાસ વેરાઇ ગયું હોવાની સંભાવના રહેલી છે.
(સંકેત)