દિલ્હી:ઉત્તર કોરિયામાં તાવના 2 લાખ 32 હજાર નવા કેસ નોંધાયા છે જયારે વધુ 6 લોકોના મોત થયા હોવાનું સામે આવ્યું છે.ઉત્તર કોરિયાના એન્ટી વાઈરસ (કોવિડ-19) હેડક્વાર્ટર અનુસાર, એપ્રિલના અંતથી સમગ્ર દેશમાં ઝડપથી ફેલાતા તાવને કારણે 56 દર્દીઓના મોત થયા છે અને એક કરોડ 48 લાખથી વધુ લોકો બીમાર પડ્યા છે.નિષ્ણાતોનું માનવું છે કે,મોટાભાગના બીમાર લોકો કોવિડ-19થી સંક્રમિત છે.અધિકારીઓએ જણાવ્યું કે,ઓછામાં ઓછા 663,910 લોકો હજુ પણ એકલતામાં છે.
જો કે, સત્તાવાર મીડિયા સ્પષ્ટ નથી કરી રહ્યું કે કોવિડ-19ને કારણે તાવના કેટલા કેસની પુષ્ટિ થઈ છે. નિષ્ણાતો માને છે કે ઉત્તર કોરિયાની જર્જરિત આરોગ્ય પ્રણાલીને જોતા, વાયરસના ચેપના ગંભીર પરિણામો આવી શકે છે.દેશમાં એક લાખથી વધુ જાહેર આરોગ્ય અધિકારીઓ, શિક્ષકો અને તબીબી વિદ્યાર્થીઓને તાવથી પીડિત લોકોની ઓળખ કરવાની જવાબદારી સોંપવામાં આવી છે.
રવિવારે શાસક પક્ષની બેઠક દરમિયાન, ઉત્તર કોરિયાના નેતા કિમ જોંગ ઉને પણ તેની સેનાને પ્યોંગયાંગમાં રોગચાળા સામેની લડાઈમાં સામેલ થવાનો આદેશ આપ્યો હતો અને ચિંતા વ્યક્ત કરી હતી કે દવાઓ સમયસર સપ્લાય કરવામાં આવી રહી નથી. એક અહેવાલ મુજબ,કોરિયન પીપલ્સ આર્મીએ સોમવારે પ્યોંગયાંગમાં ફાર્મસીઓમાં દવાની અવરજવરમાં મદદ કરવા માટે તેના તબીબી એકમોમાંથી અધિકારીઓ અને નોન-કમિશન્ડ અધિકારીઓને તૈનાત કરવાનું શરૂ કર્યું છે.જે વાયરસ સંકટનો સામનો કરવા માટે દિવસના 24 કલાક ખુલ્લું રહેશે.