મહારાષ્ટ્ર પોલીસની સાયબર ટીમે મ્યાનમારમાં સાયબર ગુલામીમાં ફસાયેલા 60 થી વધુ ભારતીય નાગરિકોને બચાવ્યા છે. તેમજ સાયબર ટીમે એક વિદેશી નાગરિક સહિત પાંચ એજન્ટોની પણ ધરપકડ કરી છે. એક વરિષ્ઠ અધિકારીએ જણાવ્યું હતું કે પીડિતોને વિદેશમાં ઉચ્ચ પગારવાળી નોકરીઓનું વચન આપવામાં આવ્યું હતું પરંતુ ત્યાં સાયબર છેતરપિંડી કરવા માટે તેમને ધમકી આપવામાં આવી હતી અને શારીરિક ત્રાસ આપવામાં આવ્યો હતો. ધરપકડ કરાયેલા આરોપીઓની ઓળખ મનીષ ગ્રે ઉર્ફે મેડી, ટાયસન ઉર્ફે આદિત્ય રવિ ચંદ્રન, રૂપનારાયણ રામધર ગુપ્તા, જેન્સી રાની ડી અને ચીની-કઝાકિસ્તાની નાગરિક તાલાનિતી નુલાઈક્સી તરીકે થઈ છે. તે બધા એજન્ટ તરીકે કામ કરતા હતા.
અધિકારીએ જણાવ્યું હતું કે મનીષ ગ્રે ઉર્ફે મેડી એક વ્યાવસાયિક અભિનેતા છે જે વેબ સિરીઝ અને ટેલિવિઝન શોમાં દેખાયા છે. તેમણે કહ્યું કે ગ્રે, અન્ય લોકો સાથે મળીને, અજાણ્યા વ્યક્તિઓની ભરતી કરી અને તેમને મ્યાનમારમાં ખોટી રીતે લઈ જતો હતો. જ્યારે તાલનીતી નુલ્ક્સી ભારતમાં સાયબર ગુનાઓ કરવા માટે એક યુનિટ સ્થાપવાની યોજના બનાવી રહી હતી.
અધિકારીએ દાવો કર્યો હતો કે, મહારાષ્ટ્ર સાયબર ટીમ દ્વારા સાયબર ગુલામીના કેસમાં વિદેશ મંત્રાલય અને ગૃહ મંત્રાલયની મદદથી અત્યાર સુધીની આ સૌથી મોટી કાર્યવાહી છે. તેમણે કહ્યું કે મહારાષ્ટ્ર સાયબર ટીમે આ સંદર્ભમાં ત્રણ FIR નોંધી છે. અધિકારીએ જણાવ્યું હતું કે મહારાષ્ટ્ર સાયબર સેલે અન્ય એજન્સીઓ સાથે મળીને પીડિતોને બચાવ્યા હતા, જોકે તેમણે આ કામગીરી મ્યાનમારની અંદર હાથ ધરવામાં આવી હતી કે કેમ તેની વિગતો આપી ન હતી.
અધિક પોલીસ મહાનિર્દેશક (મહારાષ્ટ્ર સાયબર) યશસ્વી યાદવે જણાવ્યું હતું કે, આરોપીઓમાં એવા સાથીઓનો પણ સમાવેશ થાય છે જેમણે પીડિતોને મ્યાનમાર મુસાફરી કરવામાં મદદ કરી હતી. તેમણે કહ્યું કે, કેસની તપાસ દરમિયાન, ગોવા પોલીસે ચાર આરોપીઓની ધરપકડ કરી હતી, જ્યારે અમે મુંબઈથી મુખ્ય આરોપીની ધરપકડ કરી હતી, જે એક ભારતીય હતો. તેમણે કહ્યું કે જો 60 પીડિતોમાંથી કેટલાકની ભૂમિકા સાબિત થાય તો તેમને આરોપી બનાવી શકાય છે.
અધિકારીએ જણાવ્યું હતું કે રેકેટર્સે સોશિયલ મીડિયા પ્લેટફોર્મ દ્વારા પીડિતોનો સંપર્ક કર્યો હતો અને તેમને થાઇલેન્ડ અને અન્ય પૂર્વ એશિયાઈ દેશોમાં ઉચ્ચ પગારવાળી નોકરીઓની લાલચ આપી હતી. એજન્ટોએ પીડિતો માટે પાસપોર્ટ અને ફ્લાઇટ ટિકિટની વ્યવસ્થા કરી અને તેમને ટુરિસ્ટ વિઝા પર થાઇલેન્ડ મોકલ્યા હતા. ત્યાં ઉતર્યા પછી, તેમને મ્યાનમાર સરહદ પર મોકલવામાં આવ્યા, જ્યાં તેમને નાની હોડીઓમાં નદી પાર કરાવવામાં આવી હતા. મ્યાનમારમાં પ્રવેશ્યા પછી, પીડિતોને સશસ્ત્ર બળવાખોર જૂથો દ્વારા નિયંત્રિત રક્ષિત જગ્યાઓમાં લઈ જવામાં આવતા હતા, જ્યાં તેમને ‘ડિજિટલ એરેસ્ટ’ કૌભાંડોથી લઈને નકલી રોકાણ યોજનાઓ સુધીના સાયબર છેતરપિંડી કરવા દબાણ કરવામાં આવતું હતું.