દિલ્હી: ત્રણ પ્રભાવશાળી યુએસ ધારાસભ્યોએ એક બિલ રજૂ કર્યું છે જે ગ્રીન કાર્ડ બેકલોગને ઘટાડવામાં મદદ કરશે. આ બિલમાં એવી ઘણી જોગવાઈઓ છે, જેનાથી હજારો ભારતીયોને ફાયદો થશે અને તેમના માટે અમેરિકાનું ગ્રીન કાર્ડ મેળવવાનો માર્ગ મોકળો થશે. આ બિલ ભારતીય મૂળના અમેરિકન સાંસદો રાજા કૃષ્ણમૂર્તિ અને પ્રમિલા જયપાલની સાથે રિક મેકકોર્મિક દ્વારા રજૂ કરવામાં આવ્યું છે.
એક નિવેદન જારી કરવામાં આવ્યું છે જેમાં કહેવામાં આવ્યું છે કે આ દ્વિપક્ષીય બિલ HR6542 એક્ટ (ઇમિગ્રેશન વિઝા કાર્યક્ષમતા અને સુરક્ષા કાયદો) અમેરિકન અર્થતંત્રને મજબૂત કરશે અને આંતરરાષ્ટ્રીય સ્પર્ધાને પણ પ્રોત્સાહન આપશે. આ ઉપરાંત આનાથી ગ્રીન કાર્ડનો બેકલોગ પણ ઘટશે. આ બિલની મદદથી અમેરિકન કંપનીઓ માત્ર તેમના જન્મસ્થળના આધારે નહીં પણ યોગ્યતાના આધારે કર્મચારીઓને નોકરી પર રાખી શકશે.આ બિલમાં મેરિટના આધારે રોજગાર આધારિત ઈમિગ્રેશન વિઝા માટે સાત ટકાની મર્યાદા વધારીને 15 ટકા કરવાની જોગવાઈ પણ છે.
બિલ રજૂ કરનાર અમેરિકન સાંસદ રાજા કૃષ્ણમૂર્તિએ કહ્યું કે જ્યારે અમે ભવિષ્ય માટે અર્થવ્યવસ્થાના નિર્માણ માટે કામ કરી રહ્યા છીએ. આવી સ્થિતિમાં, અમે ઉચ્ચ કૌશલ્ય ધરાવતા કર્મચારીઓને ગ્રીન કાર્ડ બેકલોગમાં અટવાયેલા રહેવા માંગતા નથી. રોજગાર આધારિત વિઝા સિસ્ટમ ઉચ્ચ કૌશલ્ય ધરાવતા લોકોને ગ્રીન કાર્ડ આપીને અમેરિકન નાગરિકતા આપે છે અને અમેરિકન અર્થવ્યવસ્થામાં મહત્વપૂર્ણ યોગદાન આપે છે.
નિવેદનમાં કહેવામાં આવ્યું છે કે અમેરિકામાં કામ કરતા 95 ટકા ઇમિગ્રન્ટ્સ અસ્થાયી વિઝાના આધારે અમેરિકામાં રહે છે અને તેમાંથી ઘણા દાયકાઓથી આવા અસ્થાયી ધોરણે અમેરિકામાં રહે છે. તેનું કારણ ગ્રીન કાર્ડ માટેનો મોટો બેકલોગ છે.