નવી દિલ્હી, 10 જુલાઈ 2026: બોલિવૂડ અભિનેતા રાજપાલ યાદવને દિલ્હી હાઈકોર્ટ તરફથી મોટો ઝટકો લાગ્યો છે. હાઈકોર્ટે ચેક-બાઉન્સના એક કેસમાં તેમને ત્રણ મહિનાની જેલની સજા સંભળાવી હતી. ‘એમ/એસ મુરલી પ્રોજેક્ટ્સ પ્રાઈવેટ લિમિટેડ’ દ્વારા દાખલ કરવામાં આવેલા કેસમાં જસ્ટિસ સ્વર્ણ કાંતા શર્માની અદાલતે આ ચુકાદો આપ્યો હતો.
દિલ્હી હાઈકોર્ટે અગાઉ સજા પર રોક લગાવી હતી
અદાલતે જણાવ્યું હતું કે રાજપાલ યાદવને તેમનું વચન પૂરું કરવાની અને કંપનીના બાકી લેણાં ચૂકવવાની અનેક તકો આપવામાં આવી હતી, પરંતુ વારંવારની ખાતરીઓ છતાં તેઓ ચુકવણી કરવામાં નિષ્ફળ રહ્યા હતા.
અગાઉ, મે 2024માં, સેશન્સ કોર્ટે પણ આ જ ચેક-બાઉન્સ કેસમાં તેને છ મહિનાની જેલની સજા સંભળાવી હતી. બાદમાં, દિલ્હી હાઈકોર્ટે તેની સજા પર રોક લગાવી દીધી હતી.
આનું કારણ એ હતું કે તેમના વકીલે કોર્ટને ખાતરી આપી હતી કે બંને પક્ષો વચ્ચે સમાધાન થઈ જશે. આ મામલો દિલ્હી હાઈકોર્ટના મધ્યસ્થતા કેન્દ્ર (Mediation Centre) ને પણ સોંપવામાં આવ્યો હતો.
વારંવારની ખાતરીઓ, છતાં કોઈ ચુકવણી નહીં
જોકે, અદાલતે નોંધ્યું હતું કે વારંવાર સમય માંગવા અને સમાધાનની ખાતરી આપવા છતાં, રાજપાલ યાદવ નિર્ધારિત રકમ જમા કરાવવામાં નિષ્ફળ રહ્યા હતા. અદાલતે એ પણ નોંધ્યું હતું કે તેમણે 2.5 કરોડની રકમ હપ્તામાં ચૂકવવાની પરવાનગી માંગી હતી, પરંતુ તેઓ તેનું પાલન કરવામાં પણ નિષ્ફળ રહ્યા હતા. આ સંજોગોને ધ્યાનમાં રાખીને, હાઈકોર્ટે અભિનેતાને ત્રણ મહિનાની જેલની સજા ફટકારી હતી.
વધુ વાંચો: હિમાચલ પ્રદેશમાં ભારે વરસાદ અને ભૂસ્ખલનને કારણે જનજીવન ખોરવાયું, અત્યાર સુધીમાં 15 લોકોના મોત