- અભિનેતા રણબીર કપૂરનો આજે 39 મો જન્મદિવસ
- ફિલ્મ સાવરિયાથી પોતાના કરિયરની કરી શરૂઆત
- રણબીરને બોલિવૂડનો ચોકલેટ બોય કહેવામાં આવે છે
મુંબઈ:રણબીર કપૂરની પહેલી ફિલ્મ ‘સાંવરિયા’ ભલે મોટા પડદા પર ફ્લોપ રહી હોય, પરંતુ તેણે પોતાની પહેલી જ ફિલ્મથી લોકોના દિલમાં જગ્યા બનાવી. આજના યુગમાં રણબીર કપૂર દરેક દિગ્દર્શક નિર્માતાની પસંદગી છે. રણબીર કપૂર 28 સપ્ટેમ્બરે પોતાનો 39 મો જન્મદિવસ ઉજવી રહ્યો છે. તેમનો જન્મ ઋષિ કપૂર અને નીતુ કપૂરના ઘરે થયો હતો.તે બોલિવૂડના સૌથી જૂના અને પ્રખ્યાત પરિવાર કપૂર પરિવારની ચોથી પેઢી છે. કપૂર પરિવારનું નામ ભલે રણબીર કપૂર સાથે જોડાયેલું હોય, પરંતુ તેણે પોતાની શાનદાર અભિનયથી કરોડો લોકોના દિલ જીતી લીધા.
રણબીર કપૂરે પોતાનો અભ્યાસ મુંબઈથી જ પૂરો કર્યો. જોકે રણબીરે ખુદ ખુલાસો કર્યો હતો કે,જ્યારે તે નાનો હતો ત્યારે તેને ભણવામાં જરાય મન લાગતું નહતું. રણબીર કપૂરે દક્ષિણ મુંબઈના માહિમમાં બોમ્બે સ્કોટિશ સ્કૂલમાં અભ્યાસ કર્યો. જ્યારે રણબીરે 10 મું પાસ કર્યું ત્યારે તેની દાદી કૃષ્ણરાજ કપૂરે ઘરે પાર્ટી આપી. જેમાં અનેક સ્ટાર્સે ભાગ લીધો હતો.રણબીરે ખુલાસો કર્યો હતો કે તેણે કપૂર પરિવારમાં સૌથી વધુ અભ્યાસ કર્યો છે.
તેમણે અમિતાભ બચ્ચન અને રાની મુખર્જીની ફિલ્મ ‘બ્લેક’માં સંજય લીલા ભણસાલીની મદદ કરી હતી. રણબીર કપૂરે વર્ષ 2007 માં સંજય લીલા ભણસાલીની સાવરિયાથી અભિનેતા તરીકે બોલિવૂડમાં પ્રવેશ કર્યો હતો. સાવરિયા બોક્સ ઓફિસ પર ફ્લોપ સાબિત થઈ. ‘સાંવરિયા’, ‘અજબ પ્રેમ કી ગઝબ કહાની’, ‘રોકસ્ટાર’ અને ‘બરફી’ પછી રણબીર કપૂરે સાબિત કર્યું કે તે એક પ્રતિભાશાળી કલાકાર છે.