મુંબઈ:બોલિવૂડ એક્ટ્રેસ જેકલીન ફર્નાન્ડીઝની મુશ્કેલીઓ ફરી એકવાર વધી ગઈ છે.EDએ અભિનેત્રીને 215 કરોડ રૂપિયાની ખંડણીના કેસમાં આરોપી બતાવી છે.તાજેતરની માહિતી અનુસાર, EDએ આજે જેકલીન વિરુદ્ધ ચાર્જશીટ દાખલ કરી છે.ચાર્જશીટમાં એવો દાવો કરવામાં આવ્યો છે કે, જેકલીનને પણ વસૂલાતના નાણાંનો ફાયદો થયો છે અને તે જાણતી હતી કે સુકેશ ગુનેગાર છે.
સૂત્રો પાસેથી મળેલી માહિતી અનુસાર, EDનું માનવું છે કે,જેકલીન પહેલાથી જ જાણતી હતી કે ઠગ સુકેશ ગુનેગાર અને ખંડણીખોર છે.જ્યારથી બોલિવૂડ એક્ટ્રેસ જેકલીન ફર્નાન્ડીઝનું મહાઠગ સુકેશ ચંદ્રશેખર સાથે કનેક્શન સામે આવ્યું છે ત્યારથી તે કાનૂની મુશ્કેલીમાં છે.તે જ સમયે, હવે EDએ અભિનેત્રી પર 215 કરોડ રૂપિયાની ઉચાપતના કેસમાં આરોપ લગાવ્યો છે.
EDએ આ આધાર પર જેકલીન પર લગાવ્યો આરોપ
- જેકલીન જાણતી હતી કે સુકેશ ગુનેગાર છે અને તે તિહાર જેલમાં બંધ છે, પરંતુ તેમ છતાં તેણે ભેટો લીધી
- જેકલીનને ખબર હતી કે તે જે કિંમતી ભેટો કરોડોમાં લઈ રહી છે તે છેતરપિંડીનાં પૈસાથી ખરીદવામાં આવી હતી.
- મુખ્ય સાક્ષીઓ અને આરોપીઓના કેટલાંક નિવેદનો પરથી જાણવા મળ્યું છે કે જેકલીન સતત વિડીયો કોલ દ્વારા સુકેશના સંપર્કમાં હતી.
- સુકેશે જેકલીનને મોંઘી ગિફ્ટ્સ આપ્યાની કબૂલાત કરી છે.
સુકેશે જેકલીનને 10 કરોડ રૂપિયાની કિંમતી ભેટ આપી હતી.EDએ અભિનેત્રીની 7 કરોડથી વધુની સંપત્તિ પણ જપ્ત કરી છે.એવું પણ કહેવામાં આવ્યું છે કે,સુકેશે જેકલીનના પરિવારના સભ્યોને મોંઘી ભેટ પણ આપી હતી.પરિવારને આપવામાં આવેલી ભેટમાં કાર, મોંઘી વસ્તુઓ ઉપરાંત રૂ. 1.32 કરોડ અને રૂ. 15 લાખનું ભંડોળ સામેલ હતું.