અમદાવાદઃ શહેરના વિકાસને કામોમાં ભ્રષ્ટાચારની અવાર-નવાર ફરિયાદો ઉઠતી હોય છે. શહેરમાં રોડ અને બિલ્ડિંગના કામોમાં વર્ષે દહાડે કરોડો રૂપિયાનો ખર્ચ કરવામાં આવે છે. જેમાં ટેન્ડરના મામલે કાયમ વિવાદ થતો જ હોય છે. શહેરના રોડ અને બિલ્ડિંગને લગતાં વિવિધ પ્રકારનાં કામોમાં સિંગલ ટેન્ડર મંજૂર નહિ કરવાનાં નિયમને છેલ્લા કેટલાય વર્ષોથી શાસક ભાજપે નેવે મુકી દીધો છે અને તેમાંય માનીતા કોન્ટ્રાકટર હોય તો સિંગલ ટેન્ડર મંજૂર કરવાનાં અને અણગમતાનાં સિંગલ ટેન્ડર રદ કરવાની વિવાદાસ્પદ નીતિ બહુમતિનાં જોરે અમલમાં મુકવામાં આવી હોવાના આક્ષેપો થઈ રહ્યા છે.
સૂત્રોના જણાવ્યા મુજબ શહેરમાં મ્યુનિ.કોર્પોરેશનની રોડ એન્ડ બિલ્ડિંગ કમિટીની બેઠકમાં દક્ષિણ ઝોનનાં મણીનગર, ઇસનપુર, વટવા વગેરે વોર્ડનાં રોડ રીગ્રેડ-રિસરફેસ કરવા બહાર પાડવામાં આવેલાં ટેન્ડરમાં ફક્ત એક જ કોન્ટ્રાકટરનું અને તે પણ 25 ટકા ઉંચા ભાવનુ 6. 87 કરોડનું ટેન્ડર દક્ષિણ ઝોન ઇજનેર ખાતાએ મંજૂરી માટે રજૂ કર્યુ હતું. આટલા ઉંચા ભાવ ઉપરાંત દક્ષિણ ઝોન ઇજનેર ખાતાએ ડામરનાં ભાવનાં તફાવત ચૂકવવાની જોગવાઇ પણ કરી હતી. આમ તો રોડ કમિટી અને પછી સ્ટે.કમિટી સિંગલ ટેન્ડર મંજૂર કરવામાં ખચકાતા નથી, પરંતુ કોઇ કારણસર રોડ કમિટીમાંથી આ સિંગલ ટેન્ડરની દરખાસ્ત રદ કરીને પરત મોકલવામાં આવી હતી.
આ સિવાય રોડ કમિટીએ પશ્ચિમ ઝોનનાં ચાંદખેડા વોર્ડમાં સિનિયર સિટિઝન પાર્ક બનાવવાનાં 42.27 લાખનાં સિંગલ ટેન્ડરને, સરખેજ ગામ તળાવનાં ડેવલપમેન્ટ માટે 2.56 કરોડનુ સિંગલ ટેન્ડરને તથા લાઇટ ખાતાનું મ્યુનિ.કચેરીઓમાં એલઇડી લાઇટ ફિટીંગ્સ લગાવવાના 62.50 લાખનુ સિંગલ ટેન્ડરને ચૂપચાપ મંજૂર કરી નાખ્યા હતા. આ બાબતે મ્યુનિ.નાં જાણકાર વર્તુળોનાં જણાવ્યા અનુસાર, જે કોઇ કોન્ટ્રાકટર પ્રભારીને મળે નહિ તેમનાં ટેન્ડર સિંગલ ન હોય અને લોએસ્ટ હોય તો પણ યેનકેન પ્રકારે દરખાસ્ત રોકી રાખવામાં આવે છે. તેવી જ રીતે સિંગલ ટેન્ડર આવે તે કોન્ટ્રાકટર પ્રભારીને મળી આવે તો સિંગલ ટેન્ડર પણ મંજૂર થઇ જાય છે.
આ ઉપરાંત મ્યુનિ.માં રોડ કૌભાંડનાં પર્દાફાશ બાદ રોડનાં કોન્ટ્રાકટરોએ સિન્ડીકેટ બનાવી દીધી હોય તેમ રોડ રિસરફેસનાં તમામ ટેન્ડરમાં 20-25 ટકા ઉંચા ભાવ ભરવાનુ શરૂ કરી દીધુ છે. બીજી બાજુ આરસીસી રોડનાં ટેન્ડર મ્યુનિ.ના અંદાજ કરતાં નીચા ભાવે આવી રહ્યાં છે. મ્યુનિ. ઇજનેર ખાતાનાં અધિકારીઓ અત્યારસુધી એવું કહેતાં હતા કે, ડામરનાં રોડ કરતાં આરસીસી રોડ પાછળ બહુ ખર્ચ થાય છે, પરંતુ હવે ચિત્ર બદલાઇ ગયુ છે અને ડામરનાં રોડ પાછળ વધુ ખર્ચ થઇ રહ્યો છે. આરસીસીનાં રોડ ખાસ કરીને સોસાયટીઓમાં બનાવાય છે તેમાં સળીયા, સિમેન્ટ, કપચી અને બેઝ વગેરે કામોમાં મોટા પ્રમાણમાં ગેરરીતિ આચરવામાં આવતી હોવાનાં આક્ષેપ થઇ રહ્યાં છે તેમ છતાં મ્યુનિ.તંત્ર અને શાસક ભાજપ થર્ડ પાર્ટી ઇન્સ્પેકશન કંપની ઉપર જવાબદારી ઢોળીને છટકી રહ્યાં છે.