લાંબી રાહ જોવડાવ્યા બાદ પીઢ અભિનેતા કમલ હાસન અભિનીત ફિલ્મ ‘ઈન્ડિયન 2’ આખરે આજે 12મી જુલાઈના રોજ સિનેમાઘરોમાં રિલીઝ થઈ છે. તેના ચાહકો પણ આ ફિલ્મની આતુરતાથી રાહ જોઈ રહ્યા હતા અને જ્યારે આ ફિલ્મ લગભગ ચાર વર્ષના શૂટિંગ પછી સિનેમાઘરોમાં આવી ત્યારે દર્શકોમાં અનેરો ઉત્સાહ જોવા મળ્યો હતો.
ફટાકડા ફોડીને ઉજવણી કરી હતી
ANIના અહેવાલ મુજબ, કમલ હાસનના ઘણા ચાહકોએ સિનેમા હોલની બહાર ફટાકડા ફોડીને ફિલ્મની રિલીઝની ઉજવણી કરી હતી. આટલું જ નહીં, ચાહકો વહેલી સવારે કોયમ્બેડુના રોહિણી સિનેમામાં ફિલ્મના પોસ્ટર સાથે ટી-શર્ટ પહેરીને પહોંચ્યા અને ફિલ્મ પ્રત્યે પોતાનો પ્રેમ વ્યક્ત કર્યો. ફેન્સની પ્રતિક્રિયા જોવા માટે અભિનેતા અને નિર્દેશક પણ ચેન્નાઈના એક થિયેટરમાં પહોંચ્યા હતા.
તમને જણાવી દઈએ કે ‘ઇન્ડિયન 2’ 1996માં આવેલી ફિલ્મ ‘ઇન્ડિયન’ની સિક્વલ છે, જેમાં કમલે વીરસેકરન સેનાપતિની ભૂમિકા ભજવી હતી. આ ફિલ્મમાં કમલ હાસન ઉપરાંત સમુતિરકાની, બોબી સિમ્હા, કાજલ અગ્રવાલ, સિદ્ધાર્થ, રકુલ પ્રીત સિંહ અને પ્રિયા ભવાની શંકર જેવા ઘણા સ્ટાર્સ જોવા મળ્યા છે.
આ ફિલ્મનું નિર્દેશન એસ શંકરે કર્યું છે. આ ફિલ્મનું પહેલું પોસ્ટર વર્ષ 2020 માં પોંગલ તહેવારના અવસર પર જાહેર કરવામાં આવ્યું હતું. લાઇકા પ્રોડક્શન્સ દ્વારા નિર્મિત, ‘ઇન્ડિયન 2’ માં અનિરુદ્ધ રવિચંદર દ્વારા સંગીત આપવામાં આવ્યું છે અને જયમોહન, કબિલન વૈરામુથુ અને લક્ષ્મી સરવણકુમાર દ્વારા લખવામાં આવ્યું છે.
‘ઇન્ડિયન 2’ બોક્સ ઓફિસ પર પ્રભુત્વ જમાવશે
ઈન્ડિયન 2 તમિલ, તેલુગુ, હિન્દી, મલયાલમ અને કન્નડ ભાષાઓમાં રિલીઝ થઈ છે. આ ફિલ્મ પહેલા ‘કલ્કી 2898 એડી’એ સિનેમાઘરોમાં પોતાની પકડ જાળવી રાખી છે અને આજે અક્ષય કુમારની ફિલ્મ ‘સરફિરા’ પણ આવી ગઈ છે. આવી સ્થિતિમાં, ટ્રેડ મુજબ, કમલ હાસનની આ ફિલ્મ તેના શરૂઆતના દિવસે લગભગ 8 થી 10 કરોડની કમાણી કરી શકે છે.