મુંબઈ: વર્લ્ડ કપ 2023ની ફાઇનલમાં ટીમ ઇન્ડિયાને ઓસ્ટ્રેલિયા સામે 6 વિકેટે હારનો સામનો કરવો પડ્યો હતો. આ સાથે ભારતીય ટીમ માટે 12 વર્ષ બાદ પણ ICC ટ્રોફીનું સપનું તૂટયું છે. આ સાથે જ ઓસ્ટ્રેલિયાએ છઠ્ઠી વખત ODI વર્લ્ડ કપનો ખિતાબ જીત્યો હતો. ફાઇનલમાં હાર બાદ ભારતીય કેપ્ટને મોટું નિવેદન આપ્યું અને હાર પાછળનું કારણ પણ જણાવ્યું.
ભારતીય કેપ્ટન રોહિત શર્માએ કહ્યું કે વર્લ્ડ કપ ફાઇનલમાં બેટિંગ સારી ન હતી જેના કારણે પરિણામ તેની તરફેણમાં ન આવ્યું પરંતુ તેને આખી ટીમ પર ગર્વ છે. મેચ બાદ રોહિતે કહ્યું કે ભલે પરિણામ અમારી તરફેણમાં ન હતું, પરંતુ અમે જાણીએ છીએ કે આજનો દિવસ અમારા માટે સારો ન હતો.પરંતુ મને ટીમ પર ગર્વ છે. રોહિતે કહ્યું, ઈમાનદારીથી કહું તો સારું થાત જો સ્કોરમાં 20-30 રન જોડાયા હોત તો. જ્યારે કેએલ રાહુલ અને વિરાટ બેટિંગ કરી રહ્યા હતા ત્યારે એવું લાગી રહ્યું હતું કે અમે 270-280 રનના સ્કોર સુધી પહોંચી જઈશું. પરંતુ અમે સતત વિકેટ ગુમાવતા રહ્યા
ઓસ્ટ્રેલિયા છઠ્ઠી વખત ચેમ્પિયન બનવા પર રોહિતે કહ્યું કે ઓસ્ટ્રેલિયાએ ત્રણ વિકેટ ગુમાવ્યા બાદ મોટી ભાગીદારી કરી હતી. 240 રન બનાવ્યા બાદ અમે વહેલી વિકેટ મેળવવા માંગતા હતા. પરંતુ ટ્રેવિસ હેડ અને માર્નસ લાબુશેનને શ્રેય જાય છે, જેમણે અમને રમતમાંથી સંપૂર્ણપણે બહાર કાઢ્યા. મને લાગ્યું કે રોશનીમાં બેટિંગ કરવા માટે વિકેટ વધુ સારી છે. અમે જાણતા હતા કે તે રોશનીમાં વધુ સારું રહેશે પરંતુ અમે તેનો ઉપયોગ બહાના તરીકે કરવા માંગતા ન હતા. અમે સારી બેટિંગ કરી ન હતી, પરંતુ મોટી ભાગીદારી કરવાનો શ્રેય તેમના બે ખેલાડીઓને જાય છે.
ઓસ્ટ્રેલિયન કેપ્ટન પેટ કમિન્સે કહ્યું કે મને લાગે છે કે અમે છેલ્લી મેચ માટે અમારા શ્રેષ્ઠ પ્રદર્શનને બચાવી લીધું હતું. મોટી મેચમાં કેટલાક ખેલાડીઓએ સારું પ્રદર્શન કર્યું હતું. અમે વિચાર્યું કે લક્ષ્યનો પીછો કરવો સરસ રહેશે અને તે સરળ હશે. પિચ ખૂબ જ ધીમી હતી, ત્યાં કોઈ સ્પિન નહોતી, અમે યોગ્ય લેન્થ બોલિંગ કરી હતી.