નવી દિલ્હી, 25 જુલાઈ 2026: લોકસભામાં વિપક્ષના નેતા રાહુલ ગાંધીએ શનિવારે NEET પેપર લીક મામલે જંતર-મંતર પર વિરોધ કરી રહેલા વિદ્યાર્થીઓ સામે કેન્દ્ર સરકાર દ્વારા લેવામાં આવેલા પગલાંને ક્રૂર અને બર્બર ગણાવ્યા હતા. રાહુલ ગાંધીએ આક્ષેપ કર્યો કે સરકાર વિદ્યાર્થી આંદોલનને દબાવવાનો પ્રયાસ કરી રહી છે.
સોશિયલ મીડિયા પ્લેટફોર્મ ‘X’ પરની એક પોસ્ટમાં રાહુલ ગાંધીએ સરકાર પર પ્રહાર કરતા લખ્યું, “મેટ્રો બંધ કરો, રસ્તાઓ રોકો, દુકાનો બંધ કરાવો, ઇન્ટરનેટ કાપી નાખો, ભોજન અટકાવો. પોતાના અધિકારોની માંગ કરી રહેલા વિદ્યાર્થીઓ સામે સરકારે આ ક્રૂર પગલાં લીધાં છે. સરકાર માત્ર એક જ વસ્તુ રોકવામાં અસમર્થ છે – પેપર લીક.”
મોદી સરકારે બ્રિટિશ શાસનકાળના અત્યાચારોને પણ વટાવી દીધા છે – રાહુલ ગાંધી
કોંગ્રેસ નેતા રાહુલ ગાંધીએ સંસદ તરફના કૂચ દરમિયાન પોલીસ કાર્યવાહીમાં ઘાયલ થયેલા એક વિદ્યાર્થીનો વીડિયો પણ શેર કર્યો અને આક્ષેપ કર્યો કે પોતાના અધિકારોની માંગ કરી રહેલા નિર્દોષ યુવાનો સાથે મોદી સરકારનું વર્તન બ્રિટિશ શાસનકાળના અત્યાચારોને પણ વટાવી ગયું છે.
આ વીડિયો શેર કરતા રાહુલ ગાંધીએ લખ્યું, “સાહિલ ત્રિરંગો હાથમાં લઈને ઊભો હતો અને માત્ર સ્વચ્છ, નિષ્પક્ષ પરીક્ષા તથા પોતાની મહેનતનું ફળ માંગી રહ્યો હતો; પોલીસે બંદૂકો તાણીને પેલેટ્સ (છરા) છોડ્યા, જેનાથી તે ગંભીર રીતે ઘાયલ થયો. આ બ્રિટિશ શાસનનો અત્યાચાર નથી; આ સ્વતંત્ર ભારતમાં મોદી સરકારની ક્રૂરતા છે, જ્યાં પોતાના અધિકારોની માંગ કરતા નિર્દોષ વિદ્યાર્થીઓને ન્યાયને બદલે પેલેટ્સ મળે છે.”