- આસામમાં પૂરનો કહેર
- 42 લાખથી વધુ લોકો પ્રભાવિત
- 24 કલાકમાં 9 લોકોના મોત
દિસપુર:આસામમાં શનિવારે પૂરની સ્થિતિ વધુ વણસી હતી, જેના કારણે 33 જિલ્લામાં અસરગ્રસ્તોની સંખ્યા 42.28 લાખ થઈ ગઈ હતી.આ વર્ષના વર્તમાન પૂરમાં મૃત્યુઆંક પાંચ દિવસમાં વધીને 34 થયો છે.આ સાથે આ વર્ષે પૂર અને ભૂસ્ખલનમાં મૃત્યુઆંક વધીને 71 થઈ ગયો છે.છેલ્લા 24 કલાકમાં ત્રણ બાળકો સહિત વધુ નવ લોકોના મોત થયા છે.
જણાવવામાં આવી રહ્યું છે કે પૂરના પાણીમાં ડૂબી જવાથી છ લોકોના મોત થયા છે, જ્યારે ત્રણ અન્ય લોકો ભૂસ્ખલનમાં માર્યા ગયા છે.કછાર જિલ્લામાંથી ત્રણ, બારપેટામાં બે લોકોના મોત થયા,જે બાદ બજલી, કામરૂપ, કરીમગંજ અને ઉદલગુરી જિલ્લામાં એક-એક મૃત્યુ નોંધાયા હતા. તે જ સમયે, આઠ લોકો ગુમ થયાના અહેવાલ છે. ડિબ્રુગઢમાંથી ચાર લોકો ગુમ છે, જ્યારે કછાર, હોજાઈ, તામુલપુર અને ઉદલગુરી જિલ્લામાંથી એક-એક વ્યક્તિ ગુમ છે.
હાલમાં 5137 ગામો પૂરની ઝપેટમાં છે.બારપેટા સૌથી વધુ અસરગ્રસ્ત જિલ્લો છે જ્યાં 12.76 લાખ લોકો ખરાબ રીતે પ્રભાવિત થયા છે.દરાંગમાં લગભગ ચાર લાખ લોકો પૂરના પાણીમાં ડૂબી ગયા છે, જ્યારે નગાંવમાં 3.64 લાખથી વધુ લોકો પૂરના કારણે પીડિત છે.પૂર પીડિતોનું કહેવું છે કે પરિસ્થિતિ વણસી રહી હોવાથી તેઓએ હવે બધું ભગવાન પર છોડી દીધું છે.
પૂર અને વરસાદને કારણે આસામમાં કછાર, દિમા હસાઓ, ગોલપારા, હૈલાકાંડી, કામરૂપ મેટ્રોપોલિટન અને કરીમગંજમાં ઘણી જગ્યાએ ભૂસ્ખલનના અહેવાલો છે. તેમાં પણ મોટી માત્રામાં નુકસાન થયું છે. જેના કારણે અનેક લોકો ઘાયલ પણ થયા છે.રાજ્યમાં પણ વરસાદની આગાહી કરવામાં આવી છે.આસામમાં હવામાન વિભાગ દ્વારા સોમવાર માટે ઓરેન્જ એલર્ટ જારી કરવામાં આવ્યું છે.તેમજ મંગળવારથી ગુરુવાર સુધી ઘણા જિલ્લાઓમાં યલો એલર્ટ જાહેર કરવામાં આવ્યું છે.