નવી દિલ્હી: કેન્દ્રીય નાણાં મંત્રી નિર્મલા સીતારમણે બુધવારે બદલાતી વૈશ્વિક વ્યાપાર પરિસ્થિતિઓ પર ગંભીર ચિંતા વ્યક્ત કરી છે. તેમણે જણાવ્યું હતું કે વર્તમાન સમયમાં શુલ્ક (ટેરિફ) અને અન્ય ઉપાયો દ્વારા વૈશ્વિક વ્યાપારને ઝડપથી ‘હથિયાર’ બનાવવામાં આવી રહ્યો છે. આવા પડકારજનક માહોલમાં ભારતે અત્યંત સાવધાનીપૂર્વક પોતાનો માર્ગ નક્કી કરવો પડશે અને દેશની સમગ્ર આર્થિક મજબૂતી જ ભારતને આ સ્પર્ધામાં ટકી રહેવા માટે વધારાની શક્તિ પૂરી પાડશે.
એક કાર્યક્રમમાં નાણાં મંત્રીએ સ્પષ્ટ કર્યું હતું કે હવે એ વાત સાફ થઈ ગઈ છે કે વૈશ્વિક વ્યાપાર હવે ‘મુક્ત અને ન્યાયી’ રહ્યો નથી. તેમણે કહ્યું, “આજે ટેરિફ અને અન્ય માધ્યમોથી વ્યાપારનો હથિયાર તરીકે ઉપયોગ થઈ રહ્યો છે. ભારતને આ બાબતે લેક્ચર આપવામાં આવે છે કે તમે ‘ટેરિફ કિંગ’ છો અથવા અંતર્મુખી છો, પરંતુ વાસ્તવિકતા એ છે કે હવે ટેરિફ અવરોધો ઊભા કરવા એ વૈશ્વિક સ્તરે ‘ન્યૂ નોર્મલ’ બની ગયું છે અને કોઈ તેના પર સવાલ પણ ઉઠાવતું નથી.”
સીતારમણે ભારપૂર્વક જણાવ્યું કે ભારતનો ઈરાદો ક્યારેય પણ શુલ્કને હથિયાર બનાવવાનો રહ્યો નથી. ભારતે માત્ર તેવા સંજોગોમાં જ કડક પગલાં લીધા છે જ્યારે વિદેશી ‘શિકારી’ કંપનીઓ દ્વારા ભારતીય બજારોમાં સસ્તા માલનું ડમ્પિંગ કરીને સ્થાનિક ઉદ્યોગોને નુકસાન પહોંચાડવાનો પ્રયાસ થયો હોય. ભારતના પગલાં હંમેશા પોતાના ઉદ્યોગોના સંરક્ષણ માટે રહ્યા છે, નહીં કે અન્યાયી વ્યાપાર કરવા માટે.
નાણાં મંત્રીએ વૈશ્વિક સ્તરે જોવા મળતા બેવડા માપદંડો પર કટાક્ષ કરતા કહ્યું કે, જે દેશો અગાઉ એમ કહેતા હતા કે ટેરિફ સારા નથી અને તેનાથી વ્યાપાર અટકે છે, તેઓ જ આજે મોટા અવરોધો ઊભા કરી રહ્યા છે. અમેરિકા દ્વારા લાદવામાં આવેલા ભારે ટેરિફ અને મેક્સિકો જેવા દેશો દ્વારા લેવામાં આવેલા તાજેતરના નિર્ણયોના સંદર્ભમાં તેમણે આ નિવેદન આપ્યું હતું. તેમણે ઉમેર્યું કે ભારતની વધતી જતી આર્થિક તાકાત જ તેને આ વૈશ્વિક ઉથલપાથલ સામે સુરક્ષા કવચ પૂરું પાડશે.