નવી દિલ્હી, 17 જુલાઈ 2026: IPS અધિકારી અનુરાગ કુમારની દિલ્હીના નવા પોલીસ કમિશનર તરીકે નિમણૂક કરવામાં આવી છે. 1994ની બેચના IPS અધિકારી અનુરાગ કુમાર, IPS અધિકારી સતીશ ગોલચાનું સ્થાન લેશે.
ઉલ્લેખનીય છે કે IPS અધિકારી અનુરાગ કુમાર અગાઉ ઇન્ટેલિજન્સ બ્યુરો (IB) માં સ્પેશિયલ ડિરેક્ટર તરીકે ફરજ બજાવતા હતા. શુક્રવારે, ગૃહ મંત્રાલયે દિલ્હીના નવા કમિશનર તરીકે તેમની નિમણૂક અંગેની સૂચના (નોટિફિકેશન) બહાર પાડી હતી.
અનુરાગ કુમારે સંભાળી લીધો કાર્યભાર
અનુરાગ કુમાર દિલ્હી પોલીસ મુખ્યાલય પહોંચ્યા છે અને નવા કમિશનર તરીકેનો કાર્યભાર સંભાળ્યો છે. આ એવી પ્રથમ ઘટના છે જેમાં વર્તમાન કમિશનરને અચાનક હટાવવાના આદેશના બે કલાકની અંદર જ નવા કમિશનરે પદ સંભાળ્યું છે.
કાર્યભાર સંભાળવાની તારીખથી લઈને પછીના આદેશ સુધી
એક સત્તાવાર આદેશમાં જણાવવામાં આવ્યું છે કે, “સક્ષમ સત્તાધિકારીની મંજૂરીથી, અનુરાગ કુમાર, IPS (AGMUT:1994) ની નિમણૂક દિલ્હીના પોલીસ કમિશનર તરીકે કરવામાં આવે છે; આ નિમણૂક કાર્યભાર સંભાળવાની તારીખથી અમલમાં આવશે અને આગામી આદેશો સુધી ચાલુ રહેશે.”
આઈપીએસ સતીશ ગોલચાને હટાવવામાં આવ્યાકેન્દ્રીય ગૃહ મંત્રાલયે UT કેડરના 1992ની બેચના IPS અધિકારી સતીશ ગોલચાને દિલ્હી પોલીસ કમિશનરના પદ પરથી હટાવી દીધા છે.
તેમનો કાર્યકાળ આવતા વર્ષના મે મહિના સુધી ચાલવાનો હતો. તેમને નિર્ધારિત સમય કરતાં લગભગ 11 મહિના વહેલા આ પદ પરથી કેમ હટાવવામાં આવ્યા, તે અંગે ઘણી અટકળો ચાલી રહી છે.
નવા અધિકારી કાર્યભાર સંભાળી લે તે પછી, IPS અધિકારી સતીશ ગોલચાને તેમની આગામી નિયુક્તિ માટે દિલ્હીના લેફ્ટનન્ટ ગવર્નર સમક્ષ હાજર થવાનો નિર્દેશ આપવામાં આવ્યો છે.
વધુ વાંચો: પશ્ચિમ બંગાળ: મુર્શિદાબાદમાં સ્કૂલ વાન ટ્રેન સાથે અથડાઈ, ત્રણ વિદ્યાર્થીઓ સહિત 4નાં મોત