નવી દિલ્હીઃ ભારતમાં આતંકવાદી પ્રવૃતિને નાથવા માટે કેન્દ્રની નરેન્દ્ર મોદી સરકાર અને સુરક્ષા એજન્સીઓએ અભિયાન શરૂ કર્યું છે. દરમિયાન પુલવામા આતંકી હુમલામાં સામેલ જૈશ-એ-મોહમ્મદના મોહિઉદ્દીન ઔરંગઝેબને નરેન્દ્ર મોદી સરકારે UAPA હેઠળ આતંકવાદી જાહેર કર્યો છે. ગૃહ મંત્રાલય દ્વારા આ અંગે નોટિફિકેશન જાહેર કરવામાં આવ્યું છે. આ નોટિફિકેશનમાં જણાવાયું છે કે, પુલવામા આતંકી હુમલામાં સામેલ મોહિઉદ્દીન ઔરંગઝેબને ગેરકાનૂની ગતિવિધિઓ (પ્રિવેન્શન) એક્ટ હેઠળ આતંકવાદી જાહેર કરવામાં આવ્યો છે.
પ્રાપ્ત માહિતી અનુસાર જમ્મુ-કાશ્મીર સહિત સમગ્ર દેશમાંથી આતંકવાદી પ્રવૃતિને નાથવા માટે સુરક્ષા એજન્સીઓ દ્વારા અભિયાન શરૂ કરવામાં આવ્યું છે. જમ્મુ-કાશ્મીરમાં સુરક્ષા એજન્સીઓએ અનેક આતંકવાદીને ઝડપીને જેલના સળિયા પાછળ ધકેલી દેવામાં આવ્યાં છે. એટલું જ નહીં સુરક્ષા એજન્સીઓએ અથડામણમાં અનેક આતંકવાદીઓને ઠાર માર્યાં છે. દરમિયાન આતંકવાદીઓએ પુલવામામાં સુરક્ષા એજન્સીઓ ઉપર કરેલા હુમલામાં 40થી વધારે સુરક્ષા જવાનોના મોત થયાં હતા. આ ઘટનાને પગલે દેશની જનતામાં નારાજગી ફેલાઈ હતી. ભારતને નુકસાન પહોંચાડવા માટે પડોશી પાકિસ્તાન આતંકવાદી પ્રવૃતિઓને પ્રોત્સાહન આપે છે.