‘The Family Man 2’ નો વિરોધ બન્યો તેજ, હવે તમિલનાડુના મંત્રીએ પ્રતિબંધની ઉઠાવી માંગ, પ્રકાશ જાવડેકરને લખ્યો પત્ર

• ‘The Family Man 2’ નો વિરોધ બન્યો તેજ
• ફિલ્મનું પ્રસારણ અટકાવવાની માંગ
• તમિલનાડુના મંત્રીએ પ્રકાશ જાવડેકરને લખ્યો પત્ર

મુંબઇ : મનોજ બાજપેયી અને સામંથા અક્કેનીની બહુચર્ચિત વેબ સિરીઝ ‘ધ ફેમિલી મેન 2’ નો વિરોધ વધુ તેજ બનવા પામ્યો છે. રવિવારે રાજ્યસભાના સાંસદ વાઇકો બાદ હવે તમિલનાડુના સુચના પ્રોદ્યોગિક મંત્રી મનુ થંગારાજએ આ સિરીઝ પર પ્રતિબંધ લગાવવાની માંગ ઉઠાવી છે. આ મામલે તમિલનાડુના આ મંત્રીઓએ કેન્દ્રીય મંત્રી પ્રકાશ જાવડેકરને એક પત્ર લખ્યો છે, જેમાં તેઓએ આ હિન્દી સિરીઝ સામે પગલાં લેવાની માંગ પણ કરી છે.

મનુ થંગારાજએ પોતાની એક ટ્વિટમાં પ્રકાશ જાવડેકરને સિરીઝ વિશે પત્ર લખવાની જાણકારી આપી હતી. તેમણે ટ્વિટમાં લખ્યું છે કે, કેન્દ્રીય મંત્રીને હિન્દી સિરીઝ ‘ધ ફેમિલી મેન 2’ ના પ્રસારણ પર તાત્કાલિક પ્રતિબંધ મૂકવાની માંગ કરવામાં આવી છે, જેનો ઉદ્દેશ તમિલ ઇલમ લિબ્રેશન વોરમાં જીવિત ઇલમ ઉગ્રવાદીઓ અને તમિલ સંસ્કૃતિનું મહિમામંડન કરવાનું છે.

મનુ થંગારાજએ પ્રકાશ જાવડેકરને જે પત્ર લખ્યો છે તેમાં કહેવવામાં આવ્યું છે કે, દેશભરમાં એમેઝોન પ્રાઇમ વીડિયો પર પ્રસારિત થનારી ‘ધ ફેમિલી મેન 2’ વેબ સિરીઝ પર પ્રતિબંધ મૂકવો જોઈએ. મનોજ બાજપેયી અને સામંથા અભિનીત ફિલ્મનું ટ્રેલર, જે હાલમાં રિલીઝ થયું હતું, તેમાં ઇલમ તમિલ લોકોને ખૂબ વાંધાજનક રીતે બતાવ્યું છે.

તેમણે એમ પણ લખ્યું છે કે, વેબ સિરીઝથી માત્ર ઇલમ તમિલોની ભાવનાઓને ઠેસ પહોંચી નથી, પરંતુ તમિલનાડુના લોકોની ભાવનાઓને પણ ઠેસ પહોંચી છે. જો તેના પ્રસારણને મંજૂરી આપવામાં આવે તો, રાજ્યમાં સંવાદિતા જાળવવી તે પ્રતિકૂળ રહેશે.