ક્વેટા, 9 જુલાઈ 2026: પાકિસ્તાનના ગેરકાયદેસર કબજા હેઠળના જમ્મુ-કાશ્મીરમાં લાંબા સમયથી ચાલી રહેલા જનઆક્રોશ અને તોફાનો શાંત થયા નથી ત્યાં પાકિસ્તાન સરકાર માટે બલૂચિસ્તાન પ્રાંતમાંથી વધુ એક મોટો માથાનો દુખાવો ઉભો થયો છે. બલૂચિસ્તાનના વિભિન્ન જિલ્લાઓ અને સંવેદનશીલ વિસ્તારોમાં સ્થાનિક પ્રદર્શનકારીઓ અને પાકિસ્તાની આર્મી તેમજ અર્ધલશ્કરી દળો (પાકિસ્તાની રેન્જર્સ) વચ્ચે હિંસક તણાવ ચરમસીમાએ પહોંચ્યો છે.
સ્થાનિક મીડિયા રીપોર્ટ અને આંતરરાષ્ટ્રીય સ્ત્રોતો પાસેથી મળતી માહિતી અનુસાર, પાકિસ્તાની સુરક્ષા દળો દ્વારા બલૂચિસ્તાનમાં થઈ રહેલા શાંતિપૂર્ણ વિરોધ પ્રદર્શનોને ડામવા માટે ભારે બળપ્રયોગ કરવામાં આવી રહ્યો છે, જેના કારણે સ્થિતિ વધુ વણસી છે. પ્રદર્શનકારીઓ મુખ્યત્વે પાકિસ્તાની આર્મી દ્વારા કરવામાં આવતા કથિત માનવાધિકાર ઉલ્લંઘનો, નિર્દોષ નાગરિકોની ગેરકાયદેસર અટકાયત, સૈન્ય ઓપરેશનના નામે લૂંટફાટ અને વર્ષોથી ચાલી આવતી ‘ફોર્સ્ડ ડિસએપિયરન્સ’ એટલે કે નાગરિકોને જબરદસ્તી ગુમ કરી દેવાની સરમુખત્યારશાહી નીતિ વિરુદ્ધ રસ્તા પર ઉતરી આવ્યા છે. આ પ્રદર્શનો દરમિયાન અનેક સ્થળોએ સુરક્ષા દળો દ્વારા પ્રદર્શનકારીઓ પર સીધું જ ફાયરિંગ કરવામાં આવ્યું હોવાના અને સેંકડો રાજકીય કાર્યકરોની ધરપકડ કરવામાં આવી હોવાના આક્ષેપો માનવાધિકાર સંગઠનો દ્વારા કરવામાં આવ્યા છે.
-
આઈએસઆઈ વિરુદ્ધ સુત્રોચ્ચાર
બલૂચિસ્તાનની આ પરિસ્થિતિના પડઘા હવે આંતરરાષ્ટ્રીય સ્તરે પણ પડવા લાગ્યા છે. પાકિસ્તાન સરકાર દ્વારા બલૂચિસ્તાનમાં આચરવામાં આવી રહેલા આ કથિત અત્યાચારો અને લશ્કરી દમનના વિરોધમાં જર્મનીના બ્રેમેન શહેરમાં બલૂચ માનવાધિકાર કાર્યકરો અને પ્રવાસી નાગરિકો મોટી સંખ્યામાં એકઠા થયા હતા. ‘બલૂચ નેશનલ મૂવમેન્ટ’ ના નેજા હેઠળ આયોજિત આ આંતરરાષ્ટ્રીય વિરોધ પ્રદર્શનમાં પ્રદર્શનકારીઓએ પાકિસ્તાની સેના અને આઈએસઆઈ વિરુદ્ધ ઉગ્ર નારાબાજી કરી હતી. સભાને સંબોધતા વક્તાઓએ વૈશ્વિક સમુદાય, સંયુક્ત રાષ્ટ્ર અને આંતરરાષ્ટ્રીય માનવાધિકાર સંસ્થાઓને આ મામલે તાત્કાલિક હસ્તક્ષેપ કરવા અપીલ કરી છે.
તેમણે આક્ષેપ કર્યો છે કે પાકિસ્તાની સત્તાવાળાઓ દ્વારા બલૂચિસ્તાનના ગ્વાદર સહિતના કોસ્ટલ અને આંતરિક વિસ્તારોમાં મિલિટરી સર્ચ ઓપરેશનના નામે સામાન્ય નાગરિકોના ઘરોને તોડી પાડવામાં આવી રહ્યા છે અને આખા પરિવારોને જબરદસ્તી પોતાના વતનમાંથી વિસ્થાપિત થવા મજબૂર કરાઈ રહ્યા છે. હિરાસતમાં થતી નિર્દોષોની હત્યાઓ અને આખા બલૂચ સમાજને આપવામાં આવતી સામુહિક સજા સામે વિશ્વ મૌન ન રહે તે માટે આ વૈશ્વિક સંગઠનો હવે વિવિધ દેશોમાં પાકિસ્તાન વિરુદ્ધ મોરચો ખોલી રહ્યા છે, જેના કારણે વૈશ્વિક મંચ પર પાકિસ્તાનની મુશ્કેલીઓ વધી રહી છે.