નવી દિલ્હીઃ વીવીઆઈપી વસંત કુજ વિસ્તારમાં પોલીસ અને લોરેન્સ ગેંગના શૂટરો વચ્ચે ધાણીફુટ ગોળીબારની ઘટના બની હતી. પોલીસે એન્કાઉન્ટર બાદ ગેંગના બે શૂટરોને ઝડપી લેવામાં આવ્યા હતા. ગેંગના બે સભ્યો પૈકી એક સગીર વયનો હોવાનું જાણવા મળે છે. પોલીસે બંને અસામાજીક તત્વોને ઝડપી લઈને કાયદેસરની કાર્યવાહી હાથ ધરી હતી.
દિલ્હી પોલીસના સ્પેશિયલ સેલે વસંત કુંજ વિસ્તારમાં એન્કાઉન્ટર બાદ લોરેન્સ ગેંગના બે શૂટરોની ધરપકડ કરી હતી. દિલ્હી પોલીસના સ્પેશિયલ સેલને માહિતી મળી હતી કે વસંત કુંજ વિસ્તારમાં લોરેન્સ ગેંગના બે શૂટર છુપાવા હોવાની માહિતી મળી હતી. જે બાદ દિલ્હી પોલીસની સ્પેશિયલ સેલ ત્યાં પહોંચી હતી. દિલ્હી પોલીસના સ્પેશિયલ સેલ અને બદમાશો વચ્ચે એન્કાઉન્ટર થયું હતું. બંને તરફથી ધાણીફુટ ગોળીબાર થયો હતો. જે બાદ પોલીસે બંને બદમાશોની ધરપકડ કરી હતી. દક્ષિણ દિલ્હીની એક પ્રખ્યાત ફાઈવ સ્ટાર હોટલ પાસે ફાયરિંગ કરવા જઈ રહ્યા હતા ત્યારે બંનેની ધરપકડ કરવામાં આવી હતી. શૂટરોની ઓળખ થઈ ગઈ છે, બંને હરિયાણાના રહેવાસી છે. એવું કહેવામાં આવી રહ્યું છે કે તેમાંથી એક સગીર છે, જે રોહતક જિલ્લામાં સશસ્ત્ર લૂંટ કેસમાં સામેલ છે. બીજો ગુનેગાર અનીશ પણ રોહતક જિલ્લામાં સશસ્ત્ર લૂંટ, આર્મ્સ એક્ટ, હુમલો વગેરેના છ ગુનાહિત કેસમાં સંડોવાયેલો છે.
તાજેતરમાં પણ દિલ્હી પોલીસે ગેંગસ્ટર ગોલ્ડી બ્રાર-લોરેન્સ બિશ્નોઈ ગેંગના શૂટરોની ધરપકડ કરી હતી. તેઓ 3 ડિસેમ્બરના રોજ પંજાબના પૂર્વ ધારાસભ્યના પંજાબી બાગના ઘરે થયેલી ફાયરિંગની ઘટનામાં સામેલ હતા. 3 ડિસેમ્બરે, લોરેન્સ બિશરોઈ-ગોલ્ડી બ્રાર ગેંગ દ્વારા ખંડણી માટે પશ્ચિમ દિલ્હીના પશ્ચિમ પંજાબી બાગમાં રહેતા પંજાબના ફરીદકોટના અકાલી દળના ભૂતપૂર્વ ધારાસભ્યના ઘરે ફાયરિંગ કરવામાં આવ્યું હતું. પૂર્વ ધારાસભ્યએ ખંડણીના પૈસા આપવાનો ઇનકાર કર્યો હતો. ફાયરિંગની આ ઘટનાનો ભેદ 72 કલાકમાં ઉકેલવાનો દાવો કરતી દિલ્હી પોલીસની ક્રાઈમ બ્રાન્ચે ગેંગના શૂટર્સ આકાશ ઉર્ફે કાસા અને નિતેશ ઉર્ફે સિન્ટીની ધરપકડ કરી છે. આરોપીના કબજામાંથી બે પિસ્તોલ, સાત કારતૂસ અને એક ચોરાયેલી મોટરસાઇકલ મળી આવી છે.
ક્રાઈમ બ્રાન્ચના વિશેષ પોલીસ કમિશનર રવિન્દ્ર સિંહ યાદવે જણાવ્યું કે 3 ડિસેમ્બરે પશ્ચિમ પંજાબી બાગમાં રહેતા અકાલી દળના ફરીદકોટ, પંજાબના પૂર્વ ધારાસભ્ય દીપ મલ્હોત્રાના ઘરે બે બદમાશોએ 7-8 ગોળી ચલાવી હતી. પોલીસને ઘટનાસ્થળેથી બે શેલ મળી આવ્યા હતા. કેસ નોંધ્યા બાદ ક્રાઈમ બ્રાન્ચમાં તૈનાત ઈન્સ્પેક્ટર રામપાલની ટીમે તપાસ શરૂ કરી હતી. પૂર્વ ધારાસભ્ય પંજાબમાં દારૂનો ધંધો કરે છે તેવું બહાર આવ્યું હતું. તેને તેના વોટ્સએપ નંબર પર કેટલાક ધમકીભર્યા/છેડતીના વોઈસ મેસેજ મળ્યા હતા. અગાઉ, પંજાબમાં તેની બે દારૂની દુકાનો લોરેન્સ બિશ્નોઈ-ગોલ્ડી બ્રાર ગેંગના સભ્યો દ્વારા સળગાવી દેવામાં આવી હતી. પંજાબમાં આ અંગે બે અલગ-અલગ કેસ નોંધાયા હતા.