દિલ્હી: વધતી મોંઘવારી વચ્ચે સામાન્ય જનતા માટે મોટી રાહતના સમાચાર છે. મોટો નિર્ણય લેતા મોદી સરકાર ઘરેલુ એલપીજી સિલિન્ડરની કિંમતમાં ધરખમ ઘટાડો કરી શકે છે. જાણકારી અનુસાર સરકાર ઘરેલુ એલપીજી સિલિન્ડરની કિંમતમાં 200 રૂપિયાનો ઘટાડો કરી શકે છે. આ નિર્ણય બાદ સામાન્ય જનતાને ચોક્કસ રાહત મળશે.
સૂત્રોના જણાવ્યા અનુસાર, સરકારે ઉજ્જવલા યોજના હેઠળ ઘરેલું રસોઈ ગેસ સિલિન્ડર પર 200 રૂપિયાની સબસિડીને મંજૂરી આપી છે. વડાપ્રધાન નરેન્દ્ર મોદીની અધ્યક્ષતામાં આજે મળેલી કેબિનેટની બેઠકમાં આ નિર્ણય લેવામાં આવ્યો છે.
આ પહેલા પહેલી ઓગસ્ટના રોજ પેટ્રોલિયમ કંપનીઓએ કોમર્શિયલ એલપીજી સિલિન્ડરના ભાવમાં 100 રૂપિયાનો ઘટાડો કર્યો હતો. જોકે, ઘરેલુ ગેસ સિલિન્ડરની કિંમતોમાં કોઈ ફેરફાર થયો નથી.
રાજધાની દિલ્હીમાં ઘરેલુ એલપીજી સિલિન્ડરની કિંમત 1103 રૂપિયા હતી, જ્યારે મુંબઈમાં એલપીજી સિલિન્ડરની કિંમત 1102.50 રૂપિયા, કોલકાતામાં 1129 રૂપિયા અને ચેન્નાઈમાં 1118.50 રૂપિયા હતી. પેટ્રોલિયમ કંપનીઓ દર મહિનાની પહેલી તારીખે એલપીજીના ભાવમાં ફેરફાર કરે છે. જો સરકાર સિલિન્ડરમાં 200 રૂપિયાનો ઘટાડો કરે છે તો દિલ્હીમાં ઘરેલુ એલપીજી સિલિન્ડરની કિંમત 903 રૂપિયા થઈ જશે.
કેબિનેટની બેઠકનું વર્ણન કરતાં અનુરાગ ઠાકુરે કહ્યું કે પીએમની અધ્યક્ષતામાં કેન્દ્રીય કેબિનેટની બેઠક યોજાઈ હતી. ચંદ્રયાન મિશન 3 ની સફળતાએ દેશ અને વિશ્વમાં અમારો દરજ્જો વધાર્યો છે. આ સફળતા ભારતની પ્રગતિની પ્રગતિ છે. કેન્દ્રીય મંત્રીએ કહ્યું કે હવે 23 ઓગસ્ટને રાષ્ટ્રીય અવકાશ દિવસ તરીકે ઉજવવામાં આવશે. ચંદ્રના દક્ષિણ ધ્રુવ પર ઉતરનાર ભારત પહેલો દેશ છે. કેબિનેટે ચંદ્રયાન 3 સાથે જોડાયેલા દરેકની પ્રશંસા કરી છે.