- પીએમ મોદી 13 જુલાઈએ ખેલાડીઓ સાથે કરશે વાતચીત
- 17 જુલાઈએ ખેલાડીઓ ભારતથી ટોક્યો જવા થશે રવાના
- કોરોના મહામારીને કારણે વાતચીત હશે વર્ચ્યુઅલ
દિલ્હી :ટોક્યો ઓલિમ્પિક માટે ભારતીય ખેલાડીઓ ટૂંક સમયમાં રવાના થવા જઇ રહ્યા છે. 17 જુલાઇએ ખેલાડીઓની પ્રથમ બેચ ભારતથી ટોક્યો જવા રવાના થશે, જ્યાં 23 જુલાઇથી રમતોનો મહાકુંભ શરૂ થવાનો છે. વડાપ્રધાન નરેન્દ્ર મોદી 13 જુલાઈએ ટોક્યો ઓલિમ્પિકમાં જતા ભારતીય ખેલાડીઓ સાથે વાત કરશે. આ વાતચીત કોરોના મહામારીને કારણે વર્ચુઅલ હશે.
આ અગાઉ વડાપ્રધાન નરેન્દ્ર મોદી પણ ઓલિમ્પિક દિવસ નિમિત્તે ખેલાડીઓ સાથે વાત કરી ચૂક્યા છે. તેમણે દેશની જનતાને મન કી બાતમાં ખેલાડીઓના સંઘર્ષની વાતો વિશે પણ માહિતગાર કર્યા. વડાપ્રધાન નરેન્દ્ર મોદીએ ટ્વિટ કર્યું હતું કે, ‘ઓલિમ્પિક દિવસ નિમિત્તે વર્ષોથી ઓલિમ્પિક રમતોમાં દેશનું પ્રતિનિધિત્વ કરનારા તમામની હું પ્રશંસા કરું છું. ભારતને તેના પ્રદાન અને અન્ય રમતવીરોને પ્રેરણા આપવા માટેના પ્રયત્નો પર ગર્વ છે.
સરકારના જન ભાગીદારી મંચ ‘માયગવ ઇન્ડિયા’ એ ટ્વિટ દ્વારા વડાપ્રધાનની ખેલાડીઓ સાથેની ક્રિયાપ્રતિક્રિયા વિશે માહિતી આપી હતી. ટ્વિટમાં લખ્યું છે કે, ‘માનનીય વડાપ્રધાન નરેન્દ્ર મોદી 23 જુલાઇથી 8 ઓગસ્ટ દરમિયાન યોજાનારી ઓલિમ્પિકમાં ભારતીય ખેલાડીઓને ટોક્યો જવા પ્રોત્સાહિત કરવા તેમની સાથે વાત કરશે. ભારતની પ્રથમ ટીમ એર ઇન્ડિયા દ્વારા રવાના થશે. ભારતના 120 થી વધુ ખેલાડીઓ ટોક્યો ઓલિમ્પિક્સ માટે ક્વોલિફાય થયા છે. ભારતીય ઓલિમ્પિક એસોસિએશન દ્વારા હજી સુધી ખેલાડીઓની સંખ્યાની સત્તાવાર જાહેરાત કરવામાં આવી નથી.