સંસદ બાદ હવે ગૃહ મંત્રાલયની સુરક્ષામાં ચૂક, નકલી દસ્તાવેજોથી અંદર ઘુસવાનો પ્રયાસ કરનાર યુવક ઝડપાયો

• દિલ્હી પોલીસે યુવાનની આગવી ઢબે પૂછપરછ શરૂ કરી
• આતંકવાદી પ્રવૃતિ સાથે સંડોવાયેલો નહીં હોવાનું પ્રાથમિક તપાસમાં ખુલ્યું
• અગાઉ સંસદમાં સુરક્ષા ચૂકની ઘટના બની હતી

નવી દિલ્હીઃ સંસદ બાદ હવે કેન્દ્રીય ગૃહ મંત્રાલયની સુરક્ષામાં ભંગનો મામલો સામે આવ્યો છે. એક યુવક નકલી દસ્તાવેજોની મદદથી ગૃહ મંત્રાલયમાં ઘુસ્યો હતો. દિલ્હી પોલીસે યુવકની ધરપકડ કરી હતી અને તેની સંયુક્ત રીતે પૂછપરછ કરવામાં આવી રહી છે. મળતી માહિતી મુજબ, દિલ્હી દત્ત પથ પોલીસ સ્ટેશને નકલી ઓળખ કાર્ડ પર નોર્થ બ્લોકમાં ગૃહ મંત્રાલયની ઓફિસમાં ઘૂસવાનો પ્રયાસ કરતા એક યુવકની ધરપકડ કરી હતી. આરોપીનું નામ આદિત્ય પ્રતાપ સિંહ હોવાનું જાણવા મળે છે.

પોલીસ તપાસ કરી રહી છે કે આદિત્ય ફેક આઈડી પર કયા હેતુથી દાખલ થયો હતો. પરંતુ હાલમાં કોઈ ટેરર ​​એન્ગલ જોવા મળ્યો નથી. મળતી માહિતી મુજબ, તે કોઈની સાથે છેતરપિંડી કરવાના ઈરાદે અંદર પ્રવેશ્યો હતો. સ્પેશિયલ સેલ અને અન્ય એજન્સીઓએ પણ આરોપીઓની પૂછપરછ કરી છે.

ગયા વર્ષે 13 ડિસેમ્બરે લોકસભામાં બે યુવકોએ ઓડિયન્સ ગેલેરીમાંથી ડેસ્ક પર કૂદીને કલર સ્મોગ કાઢવાનું શરૂ કર્યું હતું. આ દરમિયાન આખો હોલ ધુમાડાથી ભરાઈ ગયો હતો. દરમિયાન તેમના સાથીઓએ પણ સંસદની બહાર આવું જ પ્રદર્શન શરૂ કર્યું હતું. આરોપીઓએ તપાસકર્તાઓને કહ્યું હતું કે તેમનો ઉદ્દેશ્ય મણિપુર હિંસા, બેરોજગારી અને ખેડૂતોની સમસ્યાઓ તરફ ધ્યાન દોરવાનો હતો. આ કેસમાં કુલ છ લોકોની ધરપકડ કરવામાં આવી હતી.