જયપુર, 09 જુલાઈ 2026: જયપુરમાં બેકાબૂ ટ્રેલરની અડફેટે આવવાથી જીવ ગુમાવનારા પિતા અને તેમના ત્રણ પુત્રોના અંતિમ સંસ્કાર રાજસમંદ જિલ્લાના જેટપુરા ગામમાં કરવામાં આવ્યા હતા.
એક જ પરિવારમાંથી ચાર અર્થીઓ નીકળતી અને પિતા તથા તેમના ત્રણ પુત્રોની ચિતાઓ એકસાથે સળગતી હોવાના હૃદયદ્રાવક દ્રશ્યને કારણે સમગ્ર ગામ શોકમાં ડૂબી ગયું હતું. ગામના કોઈ પણ ઘરમાં ચૂલો સળગ્યો નહોતો અને અંતિમ યાત્રા દરમિયાન સૌની આંખો ભીની હતી.
ટ્રેલરની અડફેટે આવવાથી ચાર લોકોનાં મોત
જયપુરમાં અજમેર રોડ પર રસ્તાની બાજુમાં બસની રાહ જોઈ રહેલા પિતા તથા તેમના ત્રણ પુત્રો પર એક ટ્રેલર ટ્રક ફરી વળી હતી. ત્રણેય બાળકોના ઘટનાસ્થળે જ મોત નીપજ્યા હતા, જ્યારે ગંભીર રીતે ઘાયલ થયેલા પિતાનું હોસ્પિટલમાં સારવાર દરમિયાન અવસાન થયું હતું.
આ અકસ્માતમાં તેમની પત્નીના પગ પણ કચડાઈ ગયા હતા અને હાલ તેમની સારવાર ચાલી રહી છે. સંબંધીઓના જણાવ્યા અનુસાર, પિતા જયપુરમાં સાવરણી બનાવવાનું કામ કરતા હતા અને પરિવાર સાથે ગામ પરત ફરવાની તૈયારીમાં હતા. લોકસભાના અધ્યક્ષે પણ આ ઘટના અંગે દુઃખ વ્યક્ત કર્યું છે અને પરિવારને તમામ શક્ય મદદની ખાતરી આપી છે.
વધુ વાંચો: રોહિણી સેક્ટર-16માં નવનિર્મિત ઈમારત ધરાશાયી થતાં ચાર લોકોનાં મોત