મુંબઈ : જિયો યુઝર્સે એક મહિનામાં 10 એક્સાબાઈટ એટલે કે 10 બિલિયન જીબી ડેટાનો ઉપયોગ કર્યો હતો. આ આંકડો કેટલો મોટો છે તેનો અંદાજ એ વાત પરથી લગાવી શકાય છે કે 2016માં જ્યારે રિલાયન્સ જિયોએ ટેલિકોમ સેક્ટરમાં પ્રવેશ કર્યો હતો, તે સમયે સમગ્ર દેશમાં ઉપલબ્ધ તમામ નેટવર્ક્સ પર ડેટાનો વપરાશ માત્ર 4.6 એક્સાબાઈટ હતો અને તે પણ એક મહિના માટે નહીં પરંતુ આખા વર્ષ માટે. ભારતમાં પહેલીવાર કોઈ ટેલિકોમ કંપનીના નેટવર્ક પર એક મહિનામાં 10 એક્ઝાબાઈટ ડેટાનો વપરાશ થયો છે. માર્ચ ક્વાર્ટરમાં Jio નેટવર્ક પર ડેટા વપરાશનો આંકડો 30.3 એક્સાબાઈટ હતો. રિલાયન્સ જિયોએ તેના ત્રિમાસિક પરિણામોમાં આ વાતનો ખુલાસો કર્યો છે.
Jio True 5G રોલઆઉટે ડેટા વપરાશ વધારવામાં મહત્વની ભૂમિકા ભજવી છે. Jio યુઝર્સ હવે દર મહિને સરેરાશ 23.1 GB ડેટા ખર્ચી રહ્યા છે. જે બે વર્ષ પહેલા સુધી માત્ર 13.3 જીબી પ્રતિ માસ હતો. એટલે કે, દરેક Jio યુઝર 2 વર્ષ પહેલાં કરતાં દર મહિને લગભગ 10 GB વધુ ડેટા વાપરે છે.
Jio નેટવર્ક પર ડેટા વપરાશની આ સરેરાશ ટેલિકોમ ઉદ્યોગની સરેરાશ કરતાં ઘણી વધારે છે. ત્રિમાસિક પરિણામો અનુસાર, માર્ચ 2023 સુધીમાં, Jio એ 60 હજાર સાઇટ્સ પર 3.5 લાખથી વધુ 5G સેલ ઇન્સ્ટોલ કર્યા હતા. દેશભરના 2,300 થી વધુ શહેરો અને નગરો 5G કવરેજ હેઠળ આવ્યા છે અને Jio વપરાશકર્તાઓ મોટી સંખ્યામાં 5G સેવાઓનો ઉપયોગ કરી રહ્યા છે.
કંપનીનો દાવો છે કે Jio ખૂબ જ ઝડપથી 5G રોલઆઉટ કરી રહ્યું છે. વિશ્વભરમાં 5G રોલઆઉટનું આવું કોઈ ઉદાહરણ નથી. કંપની 2023 ના અંત સુધીમાં દેશભરમાં 5G કવરેજ પ્રદાન કરવા માંગે છે. 5જી રોલઆઉટની સાથે કંપની એરફાઈબરના લોન્ચની પણ તૈયારી કરી રહી છે. જિયોએ કહ્યું કે આગામી કેટલાક મહિનામાં તેનું લોન્ચિંગ શક્ય છે.રિલાયન્સ જિયોનું લક્ષ્ય 10 કરોડ ઘરોને ફાઈબર અને એરફાઈબર સાથે જોડવાનું છે.પરિણામોમાં કેટલીક અન્ય મહત્વપૂર્ણ બાબતો પણ સામે આવી છે, જેમ કે Jioની પ્રતિ યુઝર પ્રતિ મહિને સરેરાશ આવક વધીને 178.8 રૂપિયા થઈ ગઈ છે. દરરોજ યુઝર્સ કંપનીના નેટવર્ક પર 1,459 કરોડ મિનિટની વાતચીત (વોઈસ કોલિંગ) કરી રહ્યા છે. Jio નેટવર્ક સાથે જોડાયેલા દરેક ફોન પર દર મહિને લગભગ 1,003 મિનિટ કોલિંગ કરવામાં આવે છે.