મલેશિયા ઓપન બેડમિન્ટન ટુર્નામેન્ટઃ ભારતીય ખેલાડી લક્ષ્ય સેને પ્રથમ મેચ જીતી

નવી દિલ્હી, 7 જાન્યુઆરી 2026: મલેશિયા ઓપન બેડમિન્ટન ટુર્નામેન્ટમાં ભારતીય શટલર્સે ધમાકેદાર પ્રદર્શન કરીને વિશ્વનું ધ્યાન ખેંચ્યું છે. સ્ટાર ખેલાડી લક્ષ્ય સેને પોતાની પ્રથમ મેચમાં જીત મેળવી આગલા રાઉન્ડમાં પ્રવેશ કર્યો છે, જ્યારે યુવા ખેલાડી આયુષ શેટ્ટીએ પેરિસ ઓલિમ્પિકના મેડલિસ્ટને હરાવીને મોટો અપસેટ સર્જ્યો છે.

લક્ષ્ય સેનનો સંઘર્ષપૂર્ણ વિજય

ભારતના લક્ષ્ય સેને સિંગાપુરના ખેલાડી જિયા હેંગ જેસન તેહ સામે રસાકસીભરી લડત આપી હતી. 70 મિનિટ સુધી ચાલેલા આ હાઈ-વોલ્ટેજ મુકાબલામાં લક્ષ્ય સેને પોતાની આક્રમક રમત જાળવી રાખી હતી. તેણે આ મેચ 21-16, 15-21 અને 21-14 થી જીતીને ટુર્નામેન્ટમાં વિજયી શ્રીગણેશ કર્યા હતા.

આયુષ શેટ્ટીનો મોટો ઉલટફેર

દિવસની સૌથી ચોંકાવનારી જીત આયુષ શેટ્ટીના નામે રહી હતી. આયુષે ઘરઆંગણે રમી રહેલા મલેશિયાના સ્ટાર ખેલાડી લી જી જિયાને પરાજય આપ્યો હતો. ઉલ્લેખનીય છે કે લી જી જિયા પેરિસ ઓલિમ્પિકમાં કાંસ્ય પદક (Bronze Medal) વિજેતા રહી ચૂક્યા છે. આ જીત સાથે આયુષે આંતરરાષ્ટ્રીય સ્તરે પોતાની મજબૂત દાવેદારી નોંધાવી છે.

વધુ વાંચો: ઉત્તરભારતમાં કડકડતી ઠંડીઃ દિલ્હી-યુપી સહિત અનેક રાજ્યોમાં ઓરેન્જ એલર્ટ