ઇમ્ફાલ, 25 ફેબ્રુઆરી 2026: મણિપુરમાં સુરક્ષાદળોએ અલગ-અલગ સઘન અભિયાનો ચલાવીને વિવિધ પ્રતિબંધિત સંગઠનો સાથે જોડાયેલા પાંચ ઉગ્રવાદીઓની ધરપકડ કરી છે. આ કાર્યવાહી દરમિયાન મોટા પ્રમાણમાં હથિયારો અને દારૂગોળો પણ જપ્ત કરવામાં આવ્યો છે. મણિપુર પોલીસે આ અંગે સત્તાવાર માહિતી આપી હતી.
પોલીસના જણાવ્યા અનુસાર, તેંગનૌપાલ જિલ્લામાં મ્યાનમાર સરહદ પાસે આવેલા યાંગૌબુંગ ગામ નજીક સુરક્ષાદળોએ મોટું સર્ચ ઓપરેશન હાથ ધર્યું હતું. આ ઓપરેશન દરમિયાન ‘પીપલ્સ લિબરેશન આર્મી’ના ત્રણ સભ્યો અને ‘પ્રેપાક-પ્રો’ સંગઠનના એક સભ્યની ધરપકડ કરવામાં આવી હતી. આ ઉગ્રવાદીઓ સરહદી વિસ્તારમાં કોઈ મોટી ગતિવિધિને અંજામ આપવાની ફિરાકમાં હોવાની શંકા છે. એક અન્ય ઓપરેશનમાં, સુરક્ષાદળોએ થૌબલ જિલ્લાના થૌબલ હાઓખા મામાંગ વિસ્તારમાંથી ‘પ્રેપાક’ સંગઠનના વધુ એક સભ્યને દબોચી લીધો હતો. આ ધરપકડ સાથે જ સુરક્ષાદળોએ ઉગ્રવાદીઓના નેટવર્કને મોટો ફટકો માર્યો છે. માત્ર ધરપકડ જ નહીં, પરંતુ સુરક્ષાદળોએ ઇમ્ફાલ પૂર્વ જિલ્લાના નુંગાઈ હિલ વિસ્તારમાં ચલાવેલા સર્ચ ઓપરેશનમાં હથિયારોનો જથ્થો પણ શોધી કાઢ્યો છે.
સુરક્ષાદળોને ઉગ્રવાદીઓ પાસેથી એક દેશી બનાવટની રાઇફલ, એક 9 mm ની પિસ્તોલ, એક હેન્ડ ગ્રેનેડ અને 303 બોરના પાંચ જીવતા કારતૂસ મળી આવ્યાં હતા. મણિપુર પોલીસે જણાવ્યું છે કે પકડાયેલા તમામ ઉગ્રવાદીઓ વિરુદ્ધ ગુનો નોંધીને વધુ પૂછપરછ હાથ ધરવામાં આવી છે. આ ઉગ્રવાદીઓ કોના સંપર્કમાં હતા અને તેમનો આગામી પ્લાન શું હતો તે અંગે તપાસ કરવામાં આવી રહી છે. છેલ્લા કેટલાક સમયથી મણિપુરમાં અશાંતિ ફેલાવનારા તત્વો સામે સુરક્ષાદળોએ લાલ આંખ કરી છે.