જયપુર, 23 માર્ચ 2026: રાજસ્થાન ઇન્ટેલિજન્સ ટીમે પાકિસ્તાન માટે જાસૂસી કરતા એક મોટા આંતરરાષ્ટ્રીય નેટવર્કનો પર્દાફાશ કર્યો છે. આ કાર્યવાહી અંતર્ગત આસામના ડિબ્રુગઢ સ્થિત વાયુસેનાના ‘છબુઆ’ એરફોર્સ સ્ટેશન પર તૈનાત એક કર્મચારીની ધરપકડ કરવામાં આવી છે. આરોપી કર્મચારી પર ભારતીય વાયુસેનાની અત્યંત ગુપ્ત અને સંવેદનશીલ માહિતી પાકિસ્તાની હેન્ડલર્સ સુધી પહોંચાડવાનો ગંભીર આરોપ છે.
રાજસ્થાનના એડિશનલ ડાયરેક્ટર જનરલ ઓફ પોલીસ (ઇન્ટેલિજન્સ) પ્રફુલ કુમારે જણાવ્યું કે, પકડાયેલા આરોપીની ઓળખ ઉત્તર પ્રદેશના પ્રયાગરાજ સ્થિત લાહુરપારના રહેવાસી 36 વર્ષીય સુમિત કુમાર તરીકે થઈ છે. સુમિત હાલમાં આસામના ડિબ્રુગઢમાં વાયુસેનાના મથક પર એમટીએસ (મલ્ટી ટાસ્કિંગ સ્ટાફ) તરીકે સિવિલ કામકાજ સંભાળતો હતો.
આ સમગ્ર જાસૂસી કાંડનો પર્દાફાશ જાન્યુઆરી 2026માં જેસલમેરના રહેવાસી ઝબરા રામની ધરપકડ બાદ થયો હતો. ઝબરા રામની પૂછપરછ દરમિયાન તેણે સુમિત કુમારનું નામ આપ્યું હતું અને જણાવ્યું હતું કે સુમિત સતત પાકિસ્તાની ગુપ્તચર એજન્સીઓના સંપર્કમાં છે. આ કડીના આધારે ઇન્ટેલિજન્સ ટીમે સુમિત પર નજર રાખી હતી અને પુરાવા મળતા જ તેની ધરપકડ કરી હતી.
તપાસમાં સામે આવ્યું છે કે સુમિત કુમાર વર્ષ 2023થી પાકિસ્તાની એજન્ટોના સંપર્કમાં હતો. પૂછપરછમાં થયેલા ખુલાસા મુજબ, સુમિત વાયુસેનાના સ્ટેશન પર પોતાના પદનો ઉપયોગ કરીને ગુપ્ત માહિતી એકઠી કરતો હતો. એકઠી કરેલી માહિતી તે સોશિયલ મીડિયા પ્લેટફોર્મ દ્વારા પાકિસ્તાન મોકલતો હતો. આરોપીએ કબૂલાત કરી છે કે તે પૈસાના બદલામાં આ દેશદ્રોહી કૃત્ય કરતો હતો.
સુમિતની ધરપકડ બાદ રાજસ્થાન પોલીસે પ્રયાગરાજ પોલીસનો સંપર્ક સાધ્યો છે. રવિવારે એલઆઈયુ (લોકલ ઇન્ટેલિજન્સ યુનિટ) સહિતની અન્ય ગુપ્તચર એજન્સીઓ પ્રયાગરાજના લાહુરપાર પહોંચી હતી અને સુમિતના પરિવાર તેમજ ભૂતકાળની વિગતો તપાસી રહી છે. જોકે, સ્થાનિક પોલીસ આ સંવેદનશીલ મામલે હાલ કંઈપણ બોલવા તૈયાર નથી.
પોલીસે આરોપી સુમિત કુમાર વિરુદ્ધ ઓફિશિયલ સિક્રેટ્સ એક્ટ, 1923 (ગોપનીયતા અધિનિયમ) અને ભારતીય ન્યાય સંહિતાની સંબંધિત કલમો હેઠળ ગુનો નોંધી વધુ તપાસ હાથ ધરી છે. આ નેટવર્ક સાથે જોડાયેલા અન્ય શંકાસ્પદ લોકોની પણ શોધખોળ તેજ કરી દેવામાં આવી છે.