નવી દિલ્હી, 23 ફેબ્રુઆરી 2026: ટી20 ઇન્ટરનેશનલ ક્રિકેટમાં સાતત્યપૂર્ણ પ્રદર્શન કરવું એ કોઈ પણ ખેલાડી માટે પડકારજનક હોય છે. પરંતુ વિશ્વ ક્રિકેટમાં કેટલાક એવા ધુરંધરો છે જેમણે માત્ર એક મેચમાં નહીં, પરંતુ આખી સીરીઝમાં શાનદાર રમત બતાવીને પોતાની ટીમને જીત અપાવી છે. આ ખાસ યાદીમાં ભારતના દિગ્ગજ બેટ્સમેન વિરાટ કોહલી હાલમાં ટોચ પર છે, જ્યારે વર્તમાન કેપ્ટન સૂર્યકુમાર યાદવ તેને જોરદાર ટક્કર આપી રહ્યો છે.
- વિરાટ કોહલી: નંબર-1 પર અડીખમ
ટી20 ઇન્ટરનેશનલ ફોર્મેટમાંથી નિવૃત્તિ લઈ ચૂકેલા વિરાટ કોહલીના નામે સૌથી વધુ ‘પ્લેયર ઓફ ધ સીરીઝ’ જીતવાનો રેકોર્ડ છે. વર્ષ 2010 થી 2024 વચ્ચે રમાયેલી 125 મેચોમાં કોહલી 46 સીરીઝનો ભાગ રહ્યો હતો, જેમાંથી તેને 7 વખત શ્રેણીનો સર્વશ્રેષ્ઠ ખેલાડી જાહેર કરવામાં આવ્યો હતો. આ આંકડો સાબિત કરે છે કે કોહલીએ લાંબા સમય સુધી ભારત માટે મેચ વિનિંગ પ્રદર્શન કર્યું છે.
- સૂર્યકુમાર યાદવની પ્રગતિ
આ યાદીમાં બીજું નામ ભારતીય ટીમના વર્તમાન કેપ્ટન સૂર્યકુમાર યાદવનું છે. વર્ષ 2021 માં ડેબ્યૂ કર્યા બાદ માત્ર 5 વર્ષના ટૂંકા ગાળામાં (2026 સુધી) સૂર્યાએ અનેક રેકોર્ડ્સ તોડ્યા છે. 108 મેચોમાં 28 સીરીઝ રમીને સૂર્યાએ 6 વખત આ એવોર્ડ પોતાના નામે કર્યો છે. તેની વિસ્ફોટક બેટિંગના દમ પર ભારત અનેક મહત્વની શ્રેણી જીતવામાં સફળ રહ્યું છે.
- શ્રીલંકાનો ઓલરાઉન્ડર હસરંગા પણ સંયુક્ત બીજા સ્થાને
શ્રીલંકાના સ્ટાર ઓલરાઉન્ડર વનિન્દુ હસરંગાએ પણ 6 એવોર્ડ સાથે સૂર્યકુમારની બરાબરી કરી છે. 2019 થી 2026 ના ગાળામાં 95 મેચ રમનાર હસરંગાએ બોલ અને બેટ બંને વડે કમાલ બતાવીને શ્રીલંકાને અનેક સીરીઝ જીતાડી છે.
- બાબર આઝમ અને ડેવિડ વોર્નર ટોપ-5 માં સામેલ
પાકિસ્તાનના પૂર્વ કેપ્ટન બાબર આઝમે 143 મેચોમાં 41 સીરીઝ રમીને 5 વખત ‘પ્લેયર ઓફ ધ સીરીઝ’નો ખિતાબ જીત્યો છે. તેની સાથે ઓસ્ટ્રેલિયાના અનુભવી ઓપનર ડેવિડ વોર્નર પણ 110 મેચોમાં 5 એવોર્ડ સાથે આ યાદીમાં સામેલ છે.