નવી દિલ્હી, 10 જુલાઈ 2026: કેન્દ્રીય સ્વાસ્થ્ય અને પરિવાર કલ્યાણ મંત્રી અને મિશન સ્ટીયરીંગ ગ્રુપના અધ્યક્ષ જગત પ્રકાશ નડ્ડાએ આયુષ્માન ભારત ડિજિટલ મિશન (ABDM)ની પ્રગતિની સમીક્ષા કરવા અને ભારતની ડિજિટલ હેલ્થ ઇકોસિસ્ટમને વધુ મજબૂત કરવાના રોડમેપ પર ચર્ચા-વિચારણા કરવા માટે મિશન સ્ટીયરીંગ ગ્રુપની ત્રીજી બેઠકની અધ્યક્ષતા કરી હતી.
આ બેઠકમાં ત્રિપુરાના મુખ્યમંત્રી ડૉ. માણિક સાહા, મધ્યપ્રદેશના નાયબ મુખ્યમંત્રી રાજેન્દ્ર શુક્લા, આયુષ મંત્રાલય (સ્વતંત્ર પ્રભાર) અને સ્વાસ્થ્ય અને પરિવાર કલ્યાણ રાજ્ય મંત્રી પ્રતાપરાવ જાધવ, સ્વાસ્થ્ય અને પરિવાર કલ્યાણ રાજ્ય મંત્રી શ્રીમતી અનુપ્રિયા પટેલ, વાણિજ્ય અને ઉદ્યોગ તથા ઈલેક્ટ્રોનિક્સ અને ઈન્ફોર્મેશન ટેકનોલોજી રાજ્ય મંત્રી જીતિન પ્રસાદ, નીતિ આયોગના સભ્ય (આરોગ્ય) ડૉ. એમ. શ્રીનિવાસ, ભારત સરકારના મુખ્ય વૈજ્ઞાનિક સલાહકાર પ્રો. અજય કુમાર સૂદ, ઓડિશાના સ્વાસ્થ્ય મંત્રી મુકેશ મહાલિંગ, કેન્દ્રીય સ્વાસ્થ્ય સચિવ શ્રીમતી પુણ્ય સલીલા શ્રીવાસ્તવ, આયુષ મંત્રાલયના સચિવ વૈદ્ય રાજેશ કોટેચા અને નેશનલ હેલ્થ ઓથોરિટીના સીઈઓ, ડૉ. સુનિલ કુમાર બરનવાલ ઉપસ્થિત રહ્યા હતા.
આ પ્રસંગે કેન્દ્રીય સ્વાસ્થ્ય મંત્રાલય, નેશનલ હેલ્થ ઓથોરિટી, નીતિ આયોગ, ઈલેક્ટ્રોનિક્સ અને ઈન્ફોર્મેશન ટેકનોલોજી મંત્રાલય, આયુષ મંત્રાલય અને મિશન સ્ટીયરીંગ ગ્રુપના અન્ય સભ્ય સંગઠનોના વરિષ્ઠ અધિકારીઓ પણ હાજર હતા. ઉપસ્થિત મહાનુભાવોને સંબોધતા નડ્ડાએ ગુણવત્તાયુક્ત આરોગ્ય સંભાળ સુધી પહોંચ સુધારવા, સંભાળની નિરંતરતા વધારવા અને નાગરિકોને તેમના સ્વાસ્થ્ય રેકોર્ડ્સની સુરક્ષિત અને સંમતિ-આધારિત ઍક્સેસ દ્વારા સશક્ત કરવામાં ડિજિટલ પબ્લિક ઇન્ફ્રાસ્ટ્રક્ચરની પરિવર્તનકારી ભૂમિકા પર ભાર મૂક્યો હતો. તેમણે ભારપૂર્વક જણાવ્યું હતું કે ટેકનોલોજીએ દરેક નાગરિક માટે સમાવેશીતા, સુલભતા અને ઉપયોગની સરળતા સુનિશ્ચિત કરવાની સાથે સાર્વત્રિક આરોગ્ય કવરેજ પ્રાપ્ત કરવા માટે એક શક્તિશાળી સક્ષમકર્તા તરીકે કામ કરવાનું ચાલુ રાખવું જોઈએ.
બેઠક દરમિયાન, મિશન સ્ટીયરીંગ ગ્રુપે તેની અગાઉની બેઠક પછી ABDM હેઠળ થયેલી પ્રગતિની સમીક્ષા કરી હતી અને દેશના ડિજિટલ હેલ્થ ઇકોસિસ્ટમના નોંધપાત્ર વિસ્તરણની નોંધ લીધી હતી. આ મિશને આરોગ્ય સંભાળ સુવિધાઓ, હેલ્થકેર પ્રોફેશનલ્સ અને નાગરિકોમાં ડિજિટલ આરોગ્ય સેવાઓ અપનાવવામાં નોંધપાત્ર વૃદ્ધિ જોઈ છે, જે એક સંકલિત, ઇન્ટરઓપરેબલ અને નાગરિક-કેન્દ્રીય ડિજિટલ હેલ્થ ઇન્ફ્રાસ્ટ્રક્ચર બનાવવાના વિઝનને વધુ આગળ વધારે છે.