નવી દિલ્હીઃ દેશના મોટાભાગના વિસ્તારોમાં લોકો હાલ તીવ્ર ગરમી અને હીટવેવનો સામનો કરી રહ્યા છે. આ વર્ષે ગરમીનું મોજું એટલું ખતરનાક રહ્યું છે કે અત્યાર સુધીમાં દેશમાં ગરમીના કારણે રેકોર્ડ 143 લોકોએ જીવ ગુમાવ્યા છે. તેમજ 41,789 લોકો હીટસ્ટ્રોકનો ભોગ બન્યા હતા. આ આંકડા 1 માર્ચથી 20 જૂન સુધીના છે. હીટવેવને કારણે જીવ ગુમાવનારા લોકોની સંખ્યા વધુ વધી શકે છે કારણ કે નેશનલ સેન્ટર ફોર ડિસીઝ કંટ્રોલ, જે ગરમીથી સંબંધિત બીમારી અને મૃત્યુ પર નજર રાખે છે, સંસ્થાએ હજુ સુધી ઘણા રાજ્યોના ડેટા અપડેટ કર્યો નહીં હોવાનું જાણવા મળે છે. ઉપરાંત, ઘણા આરોગ્ય કેન્દ્રોમાં હીટવેવને કારણે મૃત્યુના ડેટાને અપડેટ કરવાનું બાકી છે.
સત્તાવાર આંકડાઓ અનુસાર, એકલા 20 જૂને, 14 લોકો હીટસ્ટ્રોકને કારણે મૃત્યુ પામ્યા હતા અને અન્ય નવ વ્યક્તિઓના શંકાસ્પદ મોત થયાં હતા. આ વ્યક્તિઓના મૃત્યુ પણ હીટસ્ટ્રોકને કારણે થયા હોવાની આશંકા છે. આ સાથે માર્ચ-જૂનમાં ગરમીના કારણે મૃત્યુ પામેલા લોકોની કુલ સંખ્યા વધીને 143 થઈ ગઈ છે. ઉત્તર પ્રદેશ સૌથી વધુ અસરગ્રસ્ત રાજ્ય છે, જ્યાં સૌથી વધુ મૃત્યુઆંક 35 હતો. જ્યારે હીટવેવને કારણે દિલ્હીમાં 21 અને બિહાર અને રાજસ્થાનમાં 17-17 લોકોના મોત થયા છે. ગરમીને જોતા કેન્દ્રીય સ્વાસ્થ્ય મંત્રી જેપી નડ્ડાએ તમામ હોસ્પિટલોને હીટવેવથી પીડિત દર્દીઓ માટે વિશેષ એકમો બનાવવાની સલાહ આપી છે. હવે આરોગ્ય મંત્રીએ અધિકારીઓને હોસ્પિટલોમાં જઈને આ વિશેષ એકમોની તપાસ કરવા સૂચના આપી છે. આ ઉપરાંત હીટવેવના કારણે થયેલા મૃત્યુની સમીક્ષા કરવા પણ સૂચના આપવામાં આવી છે.
દેશના ઘણા ભાગો હાલ 50 ડિગ્રી સેલ્સિયસની આસપાસ તાપમાનનો સામનો કરી રહ્યા છે. ઉંચા તાપમાનને કારણે શરીરનું તાપમાન પણ વધી રહ્યું છે. સૂર્યપ્રકાશના લાંબા સમય સુધી સંપર્કમાં રહેવાથી હીટસ્ટ્રોકનું જોખમ વધે છે. જે લોકો આત્યંતિક ગરમી સહન કરવા માટે ટેવાયેલા નથી તેઓ હીટસ્ટ્રોકનો ભોગ બને છે. હીટસ્ટ્રોકમાં, શરીરનું તાપમાન 104 ડિગ્રી સેલ્સિયસ સુધી પહોંચી શકે છે અથવા ક્યારેક તેનાથી પણ વધી જાય છે. હીટસ્ટ્રોકમાં, દર્દીને ગંભીર માથાનો દુખાવો, ઝડપી શ્વાસ, ઉલટી અથવા ઉબકા, બોલવામાં મુશ્કેલી, ચક્કર અને મૂંઝવણ જેવી સમસ્યાઓ થઈ શકે છે.