જસપ્રીત બુમરાહ હાલમાં દુનિયાના શ્રેષ્ઠ બોલરોમાંનો એક છે. એકલા બુમરાહમાં જ કોઈપણ મેચનો રસ્તો બદલવાની શક્તિ છે. બુમરાહ હવે 20 જૂનથી ઈંગ્લેન્ડ સામેની ટેસ્ટ શ્રેણીમાં રમતા જોવા મળશે. આ શ્રેણી પહેલા ઈંગ્લેન્ડના ભૂતપૂર્વ ફાસ્ટ બોલર સ્ટુઅર્ટ બ્રોડે તેની ખૂબ પ્રશંસા કરી છે. બ્રોડે આ ભારતીય બોલરની સરખામણી ઓસ્ટ્રેલિયાના મહાન બોલર ગ્લેન મેકગ્રાથ સાથે કરી છે. બ્રોડે પોતાના પોડકાસ્ટ દરમિયાન બુમરાહની પ્રશંસા કરતા કહ્યું, “જ્યારે તે બોલિંગ કરવા દોડે છે, ત્યારે તમને લાગે છે કે તે 70 માઇલ પ્રતિ કલાકની ઝડપે હશે, પરંતુ તે 90 માઇલ પ્રતિ કલાકની ઝડપે બોલિંગ કરે છે, જેના કારણે તમે યોગ્ય રીતે અનુમાન લગાવી શકતા નથી. બુમરાહનો રન-અપ એકદમ સંતુલિત છે અને તે ક્યારેય તેને બગડવા દેતો નથી. હું મેકગ્રાથને જોઉં છું, જેનો સૌથી સંતુલિત રન-અપ હતો અને બુમરાહનો રન-અપ તેના જેવો જ છે.” બુમરાહ ટેસ્ટ શ્રેણીની પાંચેય મેચમાં રમતા જોવા મળશે નહીં.
ઈંગ્લેન્ડ સામેની આ શ્રેણીમાં બધાની નજર બુમરાહ પર રહેશે. જો ભારતે ઇંગ્લેન્ડમાં ટેસ્ટ શ્રેણી જીતવી હોય તો બુમરાહ પર ઘણું નિર્ભર રહેશે. ઉપરાંત, બાકીના બોલરોએ પણ સારું પ્રદર્શન કરવું પડશે. તમને જણાવી દઈએ કે બુમરાહ આ શ્રેણીની બધી મેચો ભાગ્યે જ રમતા જોવા મળશે. બુમરાહ પોતે એક ઇન્ટરવ્યુ દરમિયાન કહ્યું છે કે તે ત્રણ ટેસ્ટ મેચ રમી શકે છે. ભારત અને ઇંગ્લેન્ડ વચ્ચેની શ્રેણી 20 જૂનથી શરૂ થશે. આ શ્રેણીની પહેલી મેચ હેડિંગ્લી ખાતે રમાશે. તે જ સમયે, બીજી ટેસ્ટ 2 જુલાઈથી બર્મિંગહામમાં શરૂ થશે. જ્યારે ત્રીજી મેચ 10 જુલાઈથી લોર્ડ્સમાં રમાશે. શ્રેણીની ચોથી મેચ 23 જુલાઈથી માન્ચેસ્ટરમાં રમાશે. તે જ સમયે, શ્રેણીની છેલ્લી મેચ 31 જુલાઈથી લંડનના ઓવલ ખાતે રમાશે.