નવી દિલ્હી, 24 માર્ચ 2026: દેશના હવામાનમાં ફરી એકવાર મોટો ફેરફાર જોવા મળી રહ્યો છે. ભારતીય હવામાન વિભાગ (IMD) દ્વારા આજે પૂર્વોત્તર રાજ્યોમાં ભારે વરસાદની સાથે દક્ષિણ અને મધ્ય ભારતના રાજ્યોમાં ગાજવીજ સાથે વાવાઝોડાની આગાહી કરવામાં આવી છે.
હવામાન વિભાગના જણાવ્યા અનુસાર, આજે અરુણાચલ પ્રદેશ, આસામ, મેઘાલય, ઉપ-હિમાલયી પશ્ચિમ બંગાળ અને સિક્કિમમાં અત્યંત ભારે વરસાદ પડી શકે છે. ખાસ કરીને સિક્કિમ અને પશ્ચિમ બંગાળના પહાડી વિસ્તારોમાં દિવસ દરમિયાન જોરદાર વાવાઝોડું ફૂંકાવાની અને કરા પડવાની પણ શક્યતા છે, જેના કારણે જનજીવન પ્રભાવિત થઈ શકે છે.
દેશના અન્ય ભાગોમાં પણ હવામાનમાં પલટો આવવાની શક્યતા છે. આગામી 26 તારીખ સુધી આંધ્ર પ્રદેશ, ઉત્તર અને દક્ષિણ આંતરિક કર્ણાટક, મરાઠવાડા અને મધ્ય મહારાષ્ટ્ર, નાગાલેન્ડ, મણિપુર, મિઝોરમ અને ત્રિપુરા રાજ્યોમાં વાવાઝોડા અને વીજળી પડવાની ચેતવણી જાહેર કરવામાં આવી છે.
જ્યાં એક તરફ વરસાદની આગાહી છે, ત્યાં બીજી તરફ દરિયાકાંઠાના વિસ્તારોમાં ગરમી વધશે. કેરળ, માહે, કોંકણ અને ગોવામાં આજે વાતાવરણ અત્યંત ગરમ અને ભેજવાળું રહેવાનું અનુમાન છે. આ વિસ્તારોમાં ઉકળાટ વધવાને કારણે લોકોની મુશ્કેલીમાં વધારો થઈ શકે છે. હવામાન વિભાગે ખેડૂતો અને મુસાફરોને સાવચેત રહેવા અને આકાશી વીજળીથી બચવા સુરક્ષિત સ્થળે રહેવાની સલાહ આપી છે.
વધુ વાંચો: પ્રાદેશિક શાંતિ અને સુરક્ષા જાળવવા માટે ભારત -અમેરિકા સતત એકબીજાના સંપર્કમાં રહેશેઃ ડો. એસ.જયશંકર