દિલ્હી : અમેરિકાની યાત્રા દરમિયાન વડા પ્રધાન નરેન્દ્ર મોદી 21 જૂને સંયુક્ત રાષ્ટ્રમાં આંતરરાષ્ટ્રીય યોગ દિવસની ઉજવણીમાં ભાગ લેશે. સંયુક્ત રાષ્ટ્ર મહાસભા (UNGA)ના 77મા સત્રના પ્રમુખ સબા કોરોસી પણ આ કાર્યક્રમમાં હાજરી આપશે. કોરોનાએ ટ્વીટ કરીને આ વિશે માહિતી આપી. તેમણે લખ્યું, હું વડાપ્રધાન નરેન્દ્ર મોદી સાથે સંયુક્ત રાષ્ટ્રના મુખ્યાલયના ઉત્તર લૉન પર આગામી સપ્તાહે સંયુક્ત રાષ્ટ્રમાં 9મા આંતરરાષ્ટ્રીય યોગ દિવસની ઉજવણીમાં ભાગ લેવા માટે ઉત્સાહિત છું.
PM મોદી 21 જૂને આંતરરાષ્ટ્રીય યોગ દિવસના અવસરે સંયુક્ત રાષ્ટ્ર સચિવાલયમાં યોગ સત્રનું નેતૃત્વ કરશે. સંયુક્ત રાષ્ટ્રની વેબસાઇટ અનુસાર, આંતરરાષ્ટ્રીય યોગ દિવસની સ્થાપના માટેનો ડ્રાફ્ટ ઠરાવ ભારત દ્વારા પ્રસ્તાવિત કરવામાં આવ્યો હતો અને રેકોર્ડ 175 સભ્ય દેશોએ તેને સમર્થન આપ્યું હતું.
તાજેતરમાં આ માહિતી આપતાં ભારતમાં સંયુક્ત રાષ્ટ્રના નિવાસી સંયોજક શોમ્બી શાર્પે જણાવ્યું હતું કે 2015થી વિશ્વએ સાચા અર્થમાં આંતરરાષ્ટ્રીય યોગ દિવસને અપનાવ્યો છે. તેમણે કહ્યું કે દરેક વ્યક્તિ યોગનું મહત્વ સમજી ચૂક્યું છે અને 175 સભ્ય દેશોએ તરત જ તેના પર હસ્તાક્ષર કર્યા છે. તે લોકપ્રિય આંતરરાષ્ટ્રીય દિવસોમાંનો એક છે અને વાસ્તવમાં ઘણી બધી વસ્તુઓનું પ્રતીક છે. તે માઇન્ડફુલનેસ અને માનસિક સ્વાસ્થ્ય માટે અસરકારક છે.
આંતરરાષ્ટ્રીય યોગ દિવસનો વિચાર સૌપ્રથમ વડાપ્રધાન નરેન્દ્ર મોદીએ 27 સપ્ટેમ્બર 2014ના રોજ સંયુક્ત રાષ્ટ્ર મહાસભામાં તેમના ભાષણ દરમિયાન રજૂ કર્યો હતો. ભારત દ્વારા પસાર કરાયેલા ડ્રાફ્ટ ઠરાવને 175 દેશોએ ટેકો આપ્યો હતો. યોગની સાર્વત્રિક માન્યતા અને વધતી જતી લોકપ્રિયતા સાથે, સંયુક્ત રાષ્ટ્રસંઘે 11 ડિસેમ્બર 2014ના રોજ 21 જૂનને આંતરરાષ્ટ્રીય યોગ દિવસ તરીકે જાહેર કર્યો. આ પછી, 21 જૂન 2015 ના રોજ પ્રથમ આંતરરાષ્ટ્રીય યોગ દિવસની ઉજવણી કરવામાં આવી.