નવી દિલ્હી: દેશના કેન્દ્રીય ગૃહ મંત્રાલય દ્વારા મધ્ય પ્રદેશના DGP ને એક પત્ર મોકલવામાં આવ્યો છે, જેમાં જણાવાયું છે કે કેન્દ્રીય કૃષિ મંત્રી શિવરાજ સિંહ ચૌહાણ પાકિસ્તાની ગુપ્તચર એજન્સી ISI ના નિશાના પર છે. આ પત્રમાં આપવામાં આવેલી માહિતી બાદ તાત્કાલિક અસરથી તેમના પરના જોખમને ધ્યાનમાં રાખીને સુરક્ષા વધારી દેવામાં આવી છે.
પ્રાપ્ત માહિતી અનુસાર, ISI દ્વારા શિવરાજ સિંહ ચૌહાણની માહિતી એકઠી કરવામાં આવી રહી હતી. હાલમાં કૃષિ મંત્રી પાસે Z+ સુરક્ષા છે, પરંતુ આ ગુપ્ત માહિતી મળ્યા બાદ તેમની સુરક્ષા વ્યવસ્થાને વધુ કડક બનાવી દેવામાં આવી છે. સુરક્ષા એજન્સીઓને આ પ્રકારના ઇનપુટ્સ મળતાંની સાથે જ, સ્થાનિક પોલીસ અને સુરક્ષા એજન્સીઓએ દિલ્હી અને ભોપાલમાં શિવરાજ સિંહ ચૌહાણની સુરક્ષા વધારી દીધી છે. શુક્રવારે મોડી રાત્રે ભોપાલ સ્થિત તેમના બંગલાની બહાર વધારાની સુરક્ષા તૈનાત કરવામાં આવી હતી. વધેલા એલર્ટ વચ્ચે પણ કેન્દ્રીય મંત્રી આજે તેમના નિયમિત સંકલ્પ મુજબ વૃક્ષારોપણ કરવા માટે ગયા હતા. તેમણે સોશિયલ મીડિયા પર તસવીરો શેર કરતા લખ્યું કે, “દરરોજ વૃક્ષારોપણના સંકલ્પના ક્રમમાં આજે ભોપાલ સ્થિત સ્માર્ટ સિટી પાર્કમાં મારા ભાણેજ-ભાણેજીઓ અને ભાઈ-બહેનો સાથે છોડ રોપ્યો.”
તેમણે આગળ લખ્યું, “વૃક્ષારોપણ જીવન રોપવા સમાન છે. ભવિષ્યની પેઢીઓને એક સારું વાતાવરણ આપવા માટે, ચાલો આપણે બધા મળીને છોડ લગાવીએ અને આપણી ધરતીને હરિયાળી અને સમૃદ્ધ બનાવીએ. વૃક્ષારોપણ અભિયાન સાથે જોડાવા માટે લિંક પર ક્લિક કરીને તમારું નામ રજિસ્ટર કરો.”