અમદાવાદ, 18 જુલાઈ 2026: અમદાવાદના મહમૂદપુરા વિસ્તારમાં આવેલી ફટાકડાની ફેક્ટરીમાં લાગેલી આગમાં આઠ લોકોનાં મોત થયાં છે અને અન્ય 15થી વધુ લોકો ઘાયલ થયા છે. મેયર અને મ્યુનિસિપલ કમિશનર ઘટનાસ્થળે પહોંચી ગયા છે.
પ્રાથમિક અહેવાલો અનુસાર, આજે બપોરે શહેરના વસ્ત્રાલ વિસ્તારમાં રામોલ-ગાત્રાડ રોડ પર આવેલી ‘મહમૂદપુરા ટેલેન્ટ ફાયરવર્કસ’ ફેક્ટરીમાં અજ્ઞાત કારણોસર આગ લાગી હતી. ફટાકડાની ફેક્ટરી હોવાને કારણે આગે ઝડપથી વિકરાળ સ્વરૂપ ધારણ કર્યું અને ગણતરીની ક્ષણોમાં જ સમગ્ર ફેક્ટરીને પોતાની ઝપેટમાં લઈ લીધી.
8 લોકોનાં મોત
મહમૂદપુરામાં મેહુલ ડોડિયા નામની વ્યક્તિ ફટાકડાની ફેક્ટરી ચલાવતી હતી. બપોરે ત્યાં અચાનક આગ લાગી અને ત્યારબાદ જોરદાર વિસ્ફોટ થયો; આ ઘટનામાં આઠ લોકોના ઘટનાસ્થળે જ મોત થયા, જ્યારે અન્ય 15થી વધુ લોકોને નજીકની હોસ્પિટલમાં દાખલ કરવામાં આવ્યા. ઘટનાસ્થળ વસ્ત્રાલ નજીક, આરએએફ (RAF) કેમ્પની પાછળ હોવાનું જાણવા મળ્યું છે. અગ્નિશમન દળના જવાનોએ આગને કાબૂમાં લીધી છે.
આગ કાબૂમાં લેવાઈ
મુખ્ય ફાયર ઓફિસરે જણાવ્યું હતું કે માહિતી મળતાં જ ફાયર ફાઈટર્સના જવાનો તાત્કાલિક ઘટનાસ્થળે પહોંચી ગયા હતા. આગ સંપૂર્ણપણે બુઝાવી દેવામાં આવી છે અને આ ઘટનામાં ઘાયલ થયેલા લોકોને હોસ્પિટલમાં ખસેડવામાં આવ્યા છે. હોસ્પિટલમાં દાખલ કરાયેલા કેટલાક લોકોની હાલત ગંભીર હોવાનું જણાવાયું છે.
વધુ વાંચો: પાકિસ્તાનમાં HIVનો ફેલાવો: સિંધની હોસ્પિટલમાં બેદરકારીને કારણે 78 બાળકોના જીવ જોખમમાં