મુંબઈ, 21 મે 2026: Domestic cricket schedule for 2026-27 announced ભારતીય ક્રિકેટ કંટ્રોલ બોર્ડ (BCCI) દ્વારા આગામી 2026-27ની સ્થાનિક સીઝન માટે સત્તાવાર શેડ્યૂલની જાહેરાત કરી દેવામાં આવી છે. દર વખતની જેમ આ વર્ષે પણ ભારતનો સ્થાનિક ક્રિકેટ જોશ અને રોમાંચથી ભરપૂર રહેશે. આ નવી સીઝનનો પ્રારંભ પ્રતિષ્ઠિત ‘દુલીપ ટ્રોફી’થી થવા જઈ રહ્યો છે, જેમાં દેશભરની શ્રેષ્ઠ પ્રતિભાઓ પોતાની તાકાત બતાવશે.
23 ઓગસ્ટથી શરૂ થશે દુલીપ ટ્રોફી
આગામી ડોમેસ્ટિક સીઝનની શરૂઆત 23 ઓગસ્ટથી દુલીપ ટ્રોફી સાથે થશે. આ વખતે ટૂર્નામેન્ટમાં છ ઝોનલ ટીમો વચ્ચે કાંટાની ટક્કર જોવા મળશે. ખેલાડીઓ અને ચાહકો જેની આતુરતાથી રાહ જોઈ રહ્યા છે તે દુલીપ ટ્રોફીની ફાઇનલ મેચ 10 સપ્ટેમ્બરના રોજ રમાશે. ત્યારબાદ તરત જ 1 ઓક્ટોબરથી હાઈ-વોલ્ટેજ ‘ઈરાની કપ’નો પણ પ્રારંભ થઈ જશે.
રણજી ટ્રોફી અને સી.કે. નાયડુ ટ્રોફી બે તબક્કામાં રમાશે
ખેલાડીઓના વર્કલોડ મેનેજમેન્ટ અને પૂરતા આરામને ધ્યાનમાં રાખીને, BCCIએ આ વખતે પણ રણજી ટ્રોફી અને કર્નલ સી.કે. નાયડુ ટ્રોફીને બે અલગ-અલગ તબક્કામાં (Two Phases) રમાડવાનો મોટો નિર્ણય લીધો છે.
પ્રથમ તબક્કો: રણજી ટ્રોફીનો પ્રથમ તબક્કો 11 ઓક્ટોબરથી શરૂ થશે જે 5 નવેમ્બર સુધી ચાલશે.
બીજો તબક્કો: ત્યારબાદ ટૂર્નામેન્ટમાં થોડો વિરામ રહેશે અને બીજો તબક્કો આવતા વર્ષે 17 જાન્યુઆરીથી ફરી શરૂ થશે.
રણજી ટ્રોફીનું ફોર્મેટ અને ગ્રુપ વિભાજન
ભારતની સૌથી પ્રતિષ્ઠિત ફર્સ્ટ-ક્લાસ ટૂર્નામેન્ટ એવી રણજી ટ્રોફીના એલીટ (Elite) ગ્રુપમાં આ વખતે કુલ 32 ટીમો ભાગ લઈ રહી છે. ટૂર્નામેન્ટને વધુ રોમાંચક બનાવવા માટે આ તમામ 32 ટીમોને 4 અલગ-અલગ ગ્રુપમાં વિભાજિત કરવામાં આવશે, જ્યાં દરેક ટીમ નૉકઆઉટ સ્ટેજમાં પહોંચવા માટે એડીચોટીનું જોર લગાવશે.
BCCI દ્વારા જાહેર કરાયેલા આ શેડ્યૂલથી સ્પષ્ટ થાય છે કે આગામી સીઝનમાં રેડ-બોલ ક્રિકેટને ખાસ પ્રાધાન્ય આપવામાં આવ્યું છે, જે યુવા ખેલાડીઓને ટેસ્ટ ક્રિકેટ માટે તૈયાર કરવામાં મહત્વની ભૂમિકા ભજવશે.
વધુ વાંચો: ભારતીય નૌકાદળનું નેક્સ્ટ જનરેશન યુદ્ધ જહાજ ‘સંઘમિત્ર’ લોન્ચ થયું