રોજગાર વાંચ્છુઓ સાથે પણ થઈ રહી છે ગુનાઈત છેતરપિંડી, જાણો મોડસ ઓપરેન્ડી વિશે

નવી દિલ્હી, 4 એપ્રિલ, 2026 – આ દેશ અને દુનિયામાં એ હદે સ્વાર્થી અને ગુનાઈત માનસિકતા ધરાવતા લોકો છે જેઓ નોકરીવાંચ્છુ બેરોજગારો સાથે પણ છેતરપિંડી કરવાનું ચૂકતા નથી. એક મીડિયા અહેવાલ દ્વારા આ વાતનો ખુલાસો થયો છે જે અનુસાર અનેક કંપનીઓનાં નામે જાહેરાત બહાર પડે છે પરંતુ એવી કંપનીઓ વાસ્તવમાં અસ્તિત્વમાં જ નથી હોતી! ત્યારે પ્રશ્ન એ ઉપસ્થિત થાય કે તો પછી લોકો જે અરજી કરે એ ડેટા ખરેખર ક્યાં જતો હશે?

શું તમે પણ લાંબા સમયથી નોકરી શોધી રહ્યા છો અને અનેક જગ્યાએ અરજી કરવા છતાં તમને કોઈ જવાબ નથી મળી રહ્યો? જો હા, તો સાવધ થઈ જાવ. તમે ‘ઘોસ્ટ હાયરિંગ’ (Ghost Hiring)નો શિકાર બની શકો છો. એક ચોંકાવનારા અહેવાલ મુજબ, ભારતમાં 10 માંથી 4 કંપનીઓ એવી નોકરીઓની જાહેરાત કરી રહી છે જે વાસ્તવમાં અસ્તિત્વમાં જ નથી.

આ પણ વાંચોઃ ગજવા-એ-હિંદના ખ્વાબમાં રાચતા અને પાકિસ્તાની હેન્ડલર સાથે સંકળાયેલા ચાર જેહાદી ઝડપાયા

શું છે આ ‘ઘોસ્ટ હાયરિંગ’?

‘ઘોસ્ટ હાયરિંગ’ અથવા ‘ફેક જોબ પોસ્ટિંગ’ એ એવી પ્રક્રિયા છે જેમાં કંપનીઓ જોબ પોર્ટલ્સ અથવા પોતાની વેબસાઈટ પર ખાલી પદોની જાહેરાત તો કરે છે, પરંતુ તેમનો હેતુ કોઈની ભરતી કરવાનો હોતો નથી. ઉમેદવારો અરજી કરે છે, ક્યારેક ઇન્ટરવ્યુ પણ લેવામાં આવે છે, પરંતુ અંતે કોઈને નોકરી મળતી નથી.

કંપનીઓ આવું કેમ કરે છે?

અહેવાલ મુજબ, કંપનીઓ આવું કરવા પાછળ કેટલાક મુખ્ય કારણો છે:

ટેલેન્ટ પૂલ તૈયાર કરવા: કંપનીઓ ઈચ્છે છે કે તેમની પાસે હંમેશા લાયક ઉમેદવારોનો ડેટા તૈયાર રહે, જેથી ભવિષ્યમાં જ્યારે ખરેખર જરૂર પડે ત્યારે તેઓ તરત જ સંપર્ક કરી શકે.

કંપનીની છબી સુધારવા: સતત હાયરિંગ બતાવવાથી રોકાણકારો અને બજારમાં એવો સંદેશ જાય છે કે કંપનીનો વિકાસ થઈ રહ્યો છે.

કર્મચારીઓ પર દબાણ: વર્તમાન કર્મચારીઓને એવું બતાવવા માટે કે જો તેઓ કાર્યક્ષમતા નહીં બતાવે, તો બહાર તેમની જગ્યા લેવા માટે સેંકડો લોકો તૈયાર છે.

ઉમેદવારો પર તેની અસર

આ ટ્રેન્ડને કારણે નોકરી શોધતા યુવાનોમાં હતાશા વધી રહી છે. તેઓ પોતાનો સમય અને મહેનત એવી પ્રક્રિયામાં વેડફી રહ્યા છે જેનું કોઈ પરિણામ આવવાનું નથી.

આનાથી કેવી રીતે બચવું?

પોસ્ટિંગની તારીખ તપાસો: જો કોઈ નોકરીની જાહેરાત 2-3 મહિનાથી વધુ જૂની હોય, તો તેની સત્યતા તપાસવી જરૂરી છે.

કંપનીની વેબસાઈટ વેરીફાય કરો: માત્ર થર્ડ પાર્ટી પોર્ટલ પર વિશ્વાસ કરવાને બદલે કંપનીના સત્તાવાર ‘કરિયર’ પેજ પર જઈને ખાતરી કરો.

નેટવર્કિંગનો ઉપયોગ કરો: તે કંપનીમાં કામ કરતા લોકો સાથે લિંક્ડઈન (LinkedIn) દ્વારા વાત કરો અને જાણો કે શું ખરેખર ત્યાં ભરતી ચાલી રહી છે.