નવી દિલ્હીઃ દેશની રાજધાની દિલ્હીમાં ફરી એકવાર કોરોનાના સતત વધી રહેલા કેસોને જોતા દિલ્હી સરકારે રાજ્યમાં જાહેર સ્થળોએ માસ્ક પહેરવાનું ફરજિયાત બનાવ્યું છે. હવે જાહેર સ્થળોએ માસ્ક ન પહેરવા પર 500 રૂપિયાના દંડની જોગવાઈ કરવામાં આવી છે. ખાનગી કારમાં મુસાફરી કરતી વખતે આ નિયમ લાગુ થશે નહીં.
સુત્રોના જણાવ્યા અનુસાર રાજધાનીમાં કોરોના સંક્રમણના બે હજારથી વધારે કેસ નોંધાયા હતા. તેમજ આઠ દર્દીઓના મોત થયા હતા. રાજધાનીમાં ચેપનો દર વધીને 17.83 થઈ ગયો છે. તે જ સમયે, સક્રિય દર્દીઓની સંખ્યા વધીને 8205 થઈ ગઈ છે. બીજી તરફ, દિલ્હીમાં Omicronના નવા સબ-વેરિઅન્ટ BA 2.75ના કેસ ઝડપથી વધી રહ્યાં હોવાથી આરોગ્ય વિભાગ ચિંતિત બન્યું છે.
લોક નાયક હોસ્પિટલના મેડિકલ ડિરેક્ટર ડૉ સુરેશ કુમારે જણાવ્યું હતું કે, ઓમિક્રોનનું નવું સબ-વેરિઅન્ટ લોકોને ઝડપથી ચેપ લગાડે છે. આ પેટા વેરિઅન્ટ કોરોના રસી મેળવનાર લોકોને પણ ચેપ લગાવી શકે છે. જોકે આ મામલે વધુ માહિતીની રાહ જોવાઈ રહી છે.
ડો. સુરેશે જણાવ્યું હતું કે, કોરોનાના કેસમાં ઘટાડાની સાથે, લોકોએ કોવિડ પ્રોટોકોલને અનુસરવાનું ઓછું કર્યું છે. એવું ન થવું જોઈએ. તેમણે કહ્યું કે કેસ વધી રહ્યા છે, પરંતુ તેમાં ઓછા ગંભીર લક્ષણો છે. ડાયાબિટીસ, હાર્ટ, ટીબી જેવી ગંભીર બીમારીઓથી પીડિત લોકોને ઘણું જોખમ સહન કરવું પડી શકે છે. તેમણે કહ્યું કે કોરોના હજુ પૂરો થયો નથી, જે લોકો ત્રણ મહિના પહેલા સંક્રમિત થયા હતા તેઓ કોવિડ પોઝિટિવમાં પાછા આવી રહ્યા છે.