નવી દિલ્હી, 17 એપ્રિલ 2026: ભારતના ચૂંટણી પંચ દ્વારા વર્ષ 2026ની વિધાનસભાની સામાન્ય ચૂંટણીઓ અને પેટાચૂંટણીઓને હિંસા-મુક્ત અને પ્રલોભન-મુક્ત બનાવવા માટે કડક કાર્યવાહી હાથ ધરવામાં આવી છે. 15 માર્ચ 2026ના રોજ ચૂંટણીનું સમયપત્રક જાહેર થયા બાદથી જ વિવિધ અમલીકરણ એજન્સીઓ કાર્યરત થઈ છે. તાજેતરના અહેવાલ મુજબ, પશ્ચિમ બંગાળ અને તમિલનાડુમાં અત્યાર સુધીમાં કુલ રૂપિયા 865 કરોડથી વધુનો મુદ્દામાલ જપ્ત કરવામાં આવ્યો છે.
ચૂંટણી પંચે જાહેર કરેલા ડેટા અનુસાર, પશ્ચિમ બંગાળમાં કુલ રૂ. 427 કરોડની જપ્તી કરવામાં આવી છે, જેમાં રૂ. 21 કરોડની રોકડ, રૂ. 81 કરોડનો દારૂ, રૂ. 100 કરોડનું ડ્રગ્સ અને રૂ. 54 કરોડની કિંમતી ધાતુઓનો સમાવેશ થાય છે. આ ઉપરાંત રૂ. 172 કરોડની અન્ય મફત ચીજવસ્તુઓ પણ કબજે લેવામાં આવી છે. બીજી તરફ, તમિલનાડુમાં જપ્તીનો આંકડો રૂ. 438 કરોડ સુધી પહોંચ્યો છે. જેમાં સૌથી વધુ રૂ. 78 કરોડની રોકડ, રૂ. 3 કરોડનો દારૂ, રૂ. 74 કરોડના ડ્રગ્સ, રૂ. 105 કરોડનું કિંમતી ધાતુ અને રૂ. 178 કરોડની અન્ય ચીજો જપ્ત કરવામાં આવી છે. બંને રાજ્યોમાં મળીને કુલ રૂ. 99 કરોડની રોકડ અને રૂ. 174 કરોડના ડ્રગ્સ પકડાયા છે.
ચૂંટણી પ્રક્રિયા દરમિયાન કોઈપણ ફરિયાદ પર તાત્કાલિક એટલે કે 100 મિનિટમાં કાર્યવાહી થાય તે માટે પંચે મોટી સંખ્યામાં ટીમો તૈનાત કરી છે. પશ્ચિમ બંગાળમાં 2,728 અને તમિલનાડુમાં 2,283 મળી કુલ 5,011 ફ્લાઈંગ સ્ક્વોડ ટીમ (FST) સતત કાર્યરત છે. આ ઉપરાંત, 5,363 સ્ટેટિક સર્વેલન્સ ટીમ (SST) પણ વિવિધ સંવેદનશીલ સ્થળોએ નાકાબંધી કરીને તપાસ કરી રહી છે.
ચૂંટણી પંચે જણાવ્યું છે કે આ તપાસ દરમિયાન સામાન્ય નાગરિકોને કોઈ અગવડ કે હેરાનગતિ ન થાય તેનું ખાસ ધ્યાન રાખવામાં આવે. જો કોઈને તપાસ અંગે ફરિયાદ હોય, તો તેના નિવારણ માટે જિલ્લા ફરિયાદ સમિતિઓની રચના કરવામાં આવી છે. નાગરિકો આદર્શ આચારસંહિતાના ઉલ્લંઘનની જાણ C-Vigil મોડ્યુલ દ્વારા પણ કરી શકે છે. ચૂંટણી પંચની આ કડક કાર્યવાહી દર્શાવે છે કે આગામી ચૂંટણીઓમાં મની પાવર અને નશીલા દ્રવ્યોના પ્રભાવને રોકવા માટે તંત્ર સંપૂર્ણ રીતે સજ્જ છે.
આ પણ વાંચોઃ રાહુલ ગાંધી વિરુદ્ધ એફઆઈઆર દાખલ કરવા હાઈકોર્ટનો આદેશ, જાણો શું છે મામલો?