પાકિસ્તાનમાં પૂર્વ ખેલાડીએ પીએસએલના પ્રેઝન્ટેશનમાં આઈપીએલનો કર્યો ઉલ્લોખ

ભારતમાં IPL પૂરજોશમાં ચાલી રહી છે, જ્યારે પાડોશી દેશ પાકિસ્તાનમાં PSL ચાલી રહ્યું છે. આ વર્ષે પાકિસ્તાન સુપર લીગ ઘણી અનોખી બાબતોને કારણે ચર્ચામાં રહી છે જેમ કે કરાચી કિંગ્સે જેમ્સ વિન્સને હેર ડ્રાયર ભેટમાં આપ્યું હતું, બીજા ખેલાડીને ટ્રીમર ભેટમાં આપવામાં આવ્યું હતું. લાહોર કલંદર્સે તેમના કેપ્ટન શાહીન આફ્રિદીને 24 કેરેટ ગોલ્ડ પ્લેટેડ iPhone 16 Pro ભેટમાં આપ્યો. પરંતુ તે દરમિયાન, ભૂતપૂર્વ પાકિસ્તાની ક્રિકેટર અને હવે કોમેન્ટેટર રમીઝ રાજાએ મેચ પછીની પ્રેઝન્ટેશન દરમિયાન એક મોટી ભૂલ કરી છે. મુલતાન સુલ્તાન્સ અને લાહોર કલંદર્સ વચ્ચે રમાયેલી 12મી મેચ પછી આયોજિત આ કાર્યક્રમમાં, રમીઝે ભૂલથી PSL ને IPL (ઇન્ડિયન પ્રીમિયર લીગ) તરીકે ઓળખાવ્યું હતું.

મેચ પછી રમીઝ રાજા એક પ્રેઝન્ટેશનનું આયોજન કરી રહ્યા હતા, જે દરમિયાન તેમણે ભૂલ કરી હતી. જ્યારે તે મુલતાન સુલ્તાનના ફાસ્ટ બોલર જોશુઆ લિટલને ‘કેચ ઓફ ધ મેચ’ એવોર્ડ આપી રહ્યો હતો. જોશની ફિલ્ડિંગની પ્રશંસા કરતી વખતે, તેણે ભૂલથી તેને ‘કેચ ઓફ ધ આઈપીએલ’ કહી દીધું, જ્યારે આ એવોર્ડ પીએસએલનો હતો. આ ઘટનાનો વીડિયો સોશિયલ મીડિયા પર ઝડપથી વાયરલ થઈ રહ્યો છે. આ ભૂલ માટે ઘણા પાકિસ્તાની ચાહકો રમીઝને ટ્રોલ કરી રહ્યા છે.

પાકિસ્તાનમાં IPL અને PSL ની સરખામણી અંગે ઘણી ચર્ચા થઈ રહી છે. ક્યારેક વાત ઈનામની રકમ વિશે હોય છે, ક્યારેક ભેટો વિશે હોય છે અને ક્યારેક ખેલાડીઓ વિશે હોય છે. ભલે ભારતીય અધિકારીઓ કે ખેલાડીઓ ક્યારેય PSL પર ચર્ચા કરતા નથી, પરંતુ પાકિસ્તાન તરફથી દરરોજ IPL વિશે આવા નિવેદનો આવતા રહે છે.