અમદાવાદઃ ગુજરાત સહિત સમગ્ર દેશમાં ખેડૂતો પ્રાકૃતિક ખેતી તરફ વળે તેવા પ્રયાસો સરકાર દ્વારા કરવામાં આવી રહ્યાં છે. દરમિયાન હવે રાજ્યની સૌથી મોટી ગણાતી ગુજરાત યુનિવર્સિટીમાં દરિયાઈ ખેતીના પાઠ ભણાવાશે. આ ઉપરાંત વિદ્યાર્થીઓને કોમ્યુનિટી મેનેજમેન્ટ, કો. ઓપરેટિવ મેનેજમેન્ટ અને નેચરલ ફાર્મિંગ સહિત કુલ આઠ અભ્યાસક્રમ ભણાવામાં આવશે.
આધારભૂત સુત્રોના જણાવ્યા અનુસાર ગુજરાત યુનિવર્સિટીનાં ઇન્ડિયન ઇન્સ્ટિટ્યૂટ ઓફ સસ્ટેનેબિલિટી દ્વારા 8 નવા કોર્સ શરૂ કરાશે. આ 8 નવા કોર્ષમાં સિવિડ ફાર્મિંગનાં કોર્સનો પણ સમાવેશ કરાયો છે.
આ કોર્સમાં જમીન સિવાય દરિયામાં કેવી રીતે ખેતી થઈ શકે તે અંગે વિદ્યાર્થીઓને માહિતગાર કરાવાશે. પ્રેક્ટિકલ અને થિયરી બંનેના માધ્યમથી વિદ્યાર્થીઓને સીવીડ ફાર્મિંગ અંગે સમજ આપવામાં આવશે.
વિદ્યાર્થીઓને નવા 8 કોર્ષ માટે બે ઓપ્શન આપશે. જેમાં ઇન્ટિગ્રેટેડ માસ્ટર ઓફ રૂરલ મેનેજમેન્ટ એન્ડ સસ્ટેનેબિલિટી (IMRS) છે, જે 10 સેમેસ્ટર સાથે 5 વર્ષનો કોર્સ રહેશે. જ્યારે માસ્ટર ઓફ રૂરલ સ્ટડીઝ (MRS) નાં માધ્યમથી પણ કોર્સ કરી શકાશે. જેમાં 4 સેમેસ્ટર સાથે આ કોર્સ 2 વર્ષનો રહેશે.
આ ઉપરાંત એગ્રીબિઝનેસ મેનેજમેન્ટ, ક્લાયમેટ ચેન્જ અને રીંયુએબલ એનર્જી, એન્ટ્રોરેન્યોરશિપ, ડેરી મેનેજમેન્ટ, કોમ્યુનિટી મેનેજમેન્ટ, કો. ઓપરેટિવ મેનેજમેન્ટ અને નેચરલ ફાર્મિંગનો અભ્યાસક્રમ ભણાવામાં આવશે.