મુંબઈઃ ભારતીય ક્રિકેટ કંટ્રોલ બોર્ડ (BCCI) લોકસભા ચૂંટણીને ધ્યાનમાં રાખીને IPL 2024 ના બીજા તબક્કાનું આયોજન ભારતની બહાર કરવા પર વિચાર કરી રહ્યું છે. મીડિયા રિપોર્ટ્સ અનુસાર, BCCIના અધિકારીઓ UAEમાં છે અને IPLનો બીજો તબક્કો ગલ્ફ કન્ટ્રીમાં યોજવાની શક્યતાઓ શોધી રહ્યા છે. આ નિર્ણય એટલા માટે લેવામાં આવ્યો છે કારણ કે લોકસભા ચૂંટણીની તારીખ IPLના બીજા તબક્કા સાથે ટકરાઈ શકે છે. જો કે, બીસીસીઆઈ આગામી સમયમાં IPLના આગામી તબક્કાના આયોજનને લઈને ચોક્કસ નિર્ણય લેવી તેવી શક્યતા છે.
રિપોર્ટ અનુસાર, હાલમાં બીસીસીઆઈના કેટલાક ટોચના અધિકારીઓ દુબઈમાં છે અને દુબઈમાં આઈપીએલના બીજા તબક્કાના આયોજનની શક્યતાઓ જોઈ રહ્યા છે. બીજી કેટલીક ફ્રેન્ચાઇઝીએ ખેલાડીઓને તેમના પાસપોર્ટ જમા કરાવવા માટે પણ કહ્યું છે. આ પહેલા 2014માં પણ લોકસભાની ચૂંટણીને ધ્યાનમાં રાખીને IPLના પ્રથમ તબક્કાનું આયોજન UAEમાં કરવામાં આવ્યું હતું. જો કે, 2019માં લોકસભાની ચૂંટણી યોજાઈ રહી હોવા છતાં, IPLની સમગ્ર સિઝન ભારતમાં યોજાઈ હતી.
માત્ર 2009માં જ આઈપીએલ સંપૂર્ણપણે વિદેશમાં (દક્ષિણ આફ્રિકા) રમાઈ હતી. આઈપીએલ સમાપ્ત થયાના થોડા દિવસો બાદ જ T20 વર્લ્ડ કપ શરૂ થશે તે જોતાં, 26 મેના રોજ ફાઈનલ યોજાય તેવી શક્યતા છે. ભારત વર્લ્ડ કપમાં તેની પ્રથમ મેચ 5 જૂને આયર્લેન્ડ સામે રમશે, જ્યારે ICC ટૂર્નામેન્ટની શરૂઆત 1 જૂને અમેરિકા અને કેનેડા વચ્ચેની મેચથી થશે.