તેહરાન, 4 જૂન 2026: ઈરાનના રિવોલ્યુશનરી ગાર્ડ કોર્પ્સએ આકરા શબ્દોમાં જણાવ્યું છે કે તેહરાન દ્વારા કરવામાં આવેલા જવાબી હુમલા અમેરિકા માટે બોધપાઠ સમાન સાબિત થવા જોઈએ. પશ્ચિમ એશિયાઈ દેશોમાં રાતોરાત થયેલા શ્રેણીબદ્ધ હુમલાઓ અંગે IRGC ના જનસંપર્ક વિભાગે એક સત્તાવાર નિવેદન જારી કરીને આ ચેતવણી આપી છે. IRGC ના નિવેદનમાં જણાવવામાં આવ્યું છે કે, “ગઈકાલે મોડી રાત્રે, અમેરિકન સેનાએ હોર્મુઝની સામુદ્રધુની પાસે એક ઈરાની ઓઈલ ટેન્કર પર મિસાઈલથી હુમલો કર્યો હતો. આ હુમલાના કારણે ટેન્કરના એન્જિન રૂમને ભારે નુકસાન પહોંચ્યું હતું.”
ઈરાની દળોએ વધુમાં જણાવ્યું હતું કે આ આક્રમકતા અને હોર્મુઝની સામુદ્રધુનીને નિયંત્રિત કરતા આંતરરાષ્ટ્રીય નિયમોના ઉલ્લંઘનના જવાબમાં, અમેરિકન-યહૂદી દુશ્મન સાથે જોડાયેલા ‘પનાયા’ નામના જહાજને IRGC નૌકાદળ દ્વારા મિસાઈલથી નિશાન બનાવવામાં આવ્યું હતું. આ જવાબી કાર્યવાહી બાદ અમેરિકી સેનાએ કેશ્મ ટાપુ પર આવેલા IRGC ના એક કમ્યુનિકેશન ટાવરને નિશાન બનાવીને હુમલો કર્યો હતો. આ સતત હુમલાઓના જવાબમાં, IRGC એરોસ્પેસ ફોર્સે આ ક્ષેત્રના એક દેશમાં સ્થિત અમેરિકન એરબેઝ અને હેલિકોપ્ટર બેઝની સાથે સાથે અમેરિકન પાંચમા કાફલાના મુખ્યાલય પર મિસાઈલ અને ડ્રોન વડે વળતો પ્રહાર કર્યો છે.
IRGC એ સ્પષ્ટ કર્યું હતું કે, “અમે અગાઉથી જ ચેતવણી આપી હતી કે કોઈપણ પ્રકારની આક્રમકતાનો જવાબ વધુ ગંભીર અને અલગ રીતે આપવામાં આવશે. અમે તે મુજબ જ કાર્યવાહી કરી છે. આ પ્રતિક્રિયાઓ એક બોધપાઠ તરીકે કામ કરશે.” પોતાના નિવેદનના અંતમાં IRGC એ પોતાની ચેતવણીનો પુનરોચ્ચાર કરતા કડક શબ્દોમાં કહ્યું છે કે, હોર્મુઝની સામુદ્રધુનીની સુરક્ષાનો ભંગ કરવાનો પ્રયાસ કરનાર અમેરિકન સેનાએ ભવિષ્યમાં આની ખૂબ ભારે કિંમત ચૂકવવી પડશે.