નવી દિલ્હીઃ મહારાષ્ટ્રમાં રાજકીય ગરમાવા વચ્ચે સુપ્રીમ કોર્ટે શિંદે જૂથને મોટી રાહત આપી છે. ડેપ્યુટી સ્પીકરે ધારાસભ્યોને આજ સુધીનો સમય આપ્યો હતો, જો કે, શિંદે જૂથને મોટી રાહત આપતા, સુપ્રીમ કોર્ટે અયોગ્યતાની નોટિસનો જવાબ આપવા માટે 11 જુલાઈના રોજ સાંજે 5.30 વાગ્યા સુધીનો સમય આપ્યો છે. આ રીતે, શિંદે જૂથના ધારાસભ્યોની ગેરલાયકાતને હાલ માટે અટકાવી દેવામાં આવી છે.
હવે આ કેસની આગામી સુનાવણી 11 જુલાઈએ થશે. એવું પૂછવામાં આવ્યું છે કે જ્યારે બળવાખોર ધારાસભ્યોએ તેમની સામે અવિશ્વાસની નોટિસ આપી હતી, ત્યારે ડેપ્યુટી સ્પીકરે તેને ગૃહમાં મૂક્યા વિના કેવી રીતે બરતરફ કરી દીધી? મતલબ કે તેમની સામેની નોટિસમાં તેઓ પોતે જજ કેવી રીતે બન્યા? બળવાખોર ધારાસભ્યોએ કોર્ટમાં કહ્યું કે, ડેપ્યુટી સ્પીકરની ભૂમિકા શંકાસ્પદ છે, તો તે તેમને (બળવાખોર ધારાસભ્યોને) ગેરલાયકાતની નોટિસ કેવી રીતે જારી કરી શકે?, બીજી તરફ મહારાષ્ટ્ર સરકાર તરફથી વકીલ અભિષેક મનુ સિંઘવીએ કહ્યું કે બળવાખોર ધારાસભ્યોએ પહેલા હાઈકોર્ટમાં જવું જોઈતું હતું.
આ સાથે મહારાષ્ટ્રમાં રસ્તાઓ પર શિવસૈનિકો અને શિંદે સમર્થકોની લડાઈ પણ જોવા મળી રહી છે. થાણેમાં આજે મોટી સંખ્યામાં શિંદે સમર્થકો રસ્તા પર ઉતરી આવ્યા હતા અને શિવસેનાના બળવાખોર નેતાઓના સમર્થનમાં પ્રદર્શન કર્યું હતું. બીજી તરફ બેઠકોનો દોર પણ ચાલી રહ્યો છે.