સાંજની ચાનો સમય હોય કે અચાનક ઘરે મહેમાનો આવી જાય, સૌથી મોટો પ્રશ્ન એ થાય કે મિનિટોમાં બની જાય અને ખાવામાં પણ મજેદાર હોય તેવું નાસ્તામાં શું બનાવવું? આવી સ્થિતિમાં રસોડામાં રહેલો બેસન (ચણાનો લોટ) આપણો સાચો તારણહાર સાબિત થાય છે. બેસન એક એવી સામગ્રી છે જે ઘરમાં સહેલાઈથી મળી જાય છે અને સ્વાસ્થ્ય માટે પણ ગુણકારી છે. જો રોજ સાંજની આ મૂંઝવણ તમને સતાવતી હોય, તો બેસનમાંથી બનતી આ 5 વાનગીઓ તમારા માટે એકદમ પરફેક્ટ સાબિત થશે. જેને બનાવવામાં માત્ર 10 મિનિટ લાગે છે અને તેનો સ્વાદ એવો છે કે ખાનાર આંગળા ચાટતા રહી જશે.
ઇન્સ્ટન્ટ બેસન પુડલા: બેસનમાંથી નાસ્તો બનાવવાની વાત આવે એટલે પુડલાનું નામ સૌથી પહેલા આવે. એક વાસણમાં બેસન લઈ તેમાં પાણી ઉમેરી ગાંઠ વગરનું સ્મૂધ બેટર બનાવો. તેમાં ઝીણી સમારેલી ડુંગળી, ટમેટા, લીલા મરચાં, કોથમીર, અજમો અને સ્વાદ મુજબ મીઠું ઉમેરી દો. હવે તવા પર તેલ લગાવીને બંને બાજુથી શેકી લો. ગરમાગરમ ચીલો લીલી ચટણી સાથે તૈયાર છે!
બેસન બ્રેડ ટોસ્ટ: જો ઉતાવળ હોય અને સમજાતું ન હોય કે શું બનાવવું, તો આ ઉત્તમ વિકલ્પ છે. બેસનમાં મસાલા અને મનપસંદ ઝીણી સમારેલી શાકભાજી ભેળવી ઘટ્ટ બેટર બનાવો. બ્રેડની સ્લાઈસને આ બેટરમાં બોળીને તવા પર ઘી કે તેલ લગાવી ક્રિસ્પી શેકી લો. 5 મિનિટમાં ટેસ્ટી ટોસ્ટ રેડી છે.
ઓછા તેલમાં ફૂલેલા-ફૂલેલા બેસનના અપ્પે: જો તમને ઓઈલ-ફ્રી ખાવાનું પસંદ હોય, તો બેસનમાં થોડું દહીં, મસાલા અને સમારેલી શિમલા મિર્ચ-ગાજર મિક્સ કરો. પકાવતા પહેલા ચપટી ઇનો ઉમેરી અપ્પે પેનમાં 5 થી 7 મિનિટ માટે ગરમ કરો. નરમ અને ગોળ અપ્પે પરિવારના સૌકોઈને ભાવશે.
ક્રિસ્પી બેસન-બટાકાના પકોડા: અચાનક કંઈક ક્રિસ્પી ખાવાનું મન થાય ત્યારે બેસનમાં એક ચમચી ચોખાનો લોટ (ક્રિસ્પીનેસ માટે), અજમો, હિંગ અને મસાલા નાખી બેટર બનાવો. બટાકાની પાતળી સ્લાઈસને ડૂબાડીને ગરમ તેલમાં તળી લો. ૫ મિનિટમાં ગરમાગરમ પકોડા તૈયાર!
બધાની ફેવરિટ બેસન-સૂજી કટલેટ: સરખા પ્રમાણમાં બેસન અને સૂજીમાં પાણી, છીણેલુ ગાજર, બાફેલા વટાણા અને ચાટ મસાલા નાખી બેટર બનાવો. તેને કઢાઈમાં થોડીવાર હલાવતા તે લોટ જેવું ઘટ્ટ થઈ જશે. હવે તેને થાળીમાં ફેલાવી ઠંડુ કરી ટિક્કીના આકારમાં કાપી લો અને તવા પર શેકી લો.