નવી દિલ્હીઃ જો દવાઓના વધતા બીલ તમને પણ પરેશાન કરે છે તો તમારા માટે રાહતની વાત એ છે કે, કેન્દ્ર સરકારે તાજેતરમાં ‘ફાર્મા સાહી દામ’ નામની એપ લોન્ચ કરી છે, જે ગ્રાહકોને બ્રાન્ડેડ દવાઓનો બોજ ઘટાડવામાં મદદ કરશે. આ એપ નેશનલ ફાર્માસ્યુટિકલ પ્રાઇસિંગ ઓથોરિટી દ્વારા વિકસાવવામાં આવી છે અને તેનો ઉપયોગ એન્ડ્રોઇડ અને iOS બંને વપરાશકર્તાઓ કરી શકે છે. ગ્રાહકોને સસ્તી છતાં સમાન ગુણવત્તાવાળી બ્રાન્ડેડ દવાઓનો વિકલ્પ મળી રહે તે માટે આ એપ રજૂ કરવામાં આવી છે. એટલે કે એપની મદદથી મોંઘી દવાઓનો સસ્તો વિકલ્પ શોધી શકાય છે.
જો ડૉક્ટરે તમારી બીમારી માટે બ્રાન્ડેડ દવા લખી છે, તો તમે એપની મદદથી તેનો સસ્તો વિકલ્પ શોધી શકો છો. આ માટે તમારે એપમાં દવાનું નામ ટાઈપ કરવાનું રહેશે, અને પછી તે તમને બ્રાન્ડેડ દવાઓના સસ્તા વિકલ્પોની સંપૂર્ણ સૂચિ બતાવશે. જે તમે ગમે ત્યાંથી ખરીદી શકો છો. ધ્યાનમાં રાખો કે આ દવાઓ વિવિધ નામો સાથે ઉપલબ્ધ હોઈ શકે છે, પરંતુ દવાની ક્રિયા એક જ રહેશે. આ દવાઓના ઔષધીય ગુણો પણ એ જ રહેશે અને તેમની ક્રિયા પણ સમાન રહેશે. આ સમગ્ર બાબતને સરળ ભાષામાં સમજવાનો પ્રયત્ન કરીએ. ઉદાહરણ તરીકે, ઓગમેન્ટિન એ ભારતમાં સૌથી વધુ વેચાતી એન્ટિબાયોટિક દવાઓમાંથી એક છે. આ બ્રાન્ડેડ દવાની 10 ગોળીઓની કિંમત આશરે રૂ.200 છે. જો કે, એપ્લિકેશનમાં તમને આ દવાના ઓછામાં ઓછા 10 વિકલ્પો મળશે જે તેના કરતા ઘણા સસ્તા છે. આ ટેબલેટ રૂ.8-10માં ખરીદી શકાય છે. એ જ રીતે, પાન ડીની 15 કેપ્સ્યુલની કિંમત રૂ.199 છે અને એ જ ફોર્મ્યુલાવાળી બીજી દવાની 10 કેપ્સ્યુલ માત્ર રૂ.22માં ખરીદી શકાય છે.
- એક તૃતીયાંશ દવાઓ પર સરકારનું નિયંત્રણ
ભારતમાં દવાઓની કિંમત અન્ય કોમોડિટીની જેમ પુરવઠા અને માંગ પર આધારિત છે. જો કે, સરકાર 33 ટકાથી વધુ દવાઓના ભાવને નિયંત્રિત કરે છે. એટલે કે આ દવાઓની કિંમતો મનસ્વી રીતે વધારી શકાય નહીં. નેશનલ ફાર્માસ્યુટિકલ પ્રાઇસિંગ ઓથોરિટી (NPPA) એ આવશ્યક દવાઓની સૂચિ બનાવી છે અને તેની કિંમતો નિયંત્રિત કરી છે. ડ્રગ પ્રાઇસ કંટ્રોલ ઓર્ડર (DPCO) હેઠળ ભારતમાં 355 દવાઓ અને તેના 882 ફોર્મ્યુલેશનની કિંમતો નક્કી કરવામાં આવી છે.
(PHOTO-FILE)