નવી દિલ્હી, 16 મે 2026: આફ્રિકાના યુદ્ધગ્રસ્ત દેશ સુદાનમાં માનવતાવાદી કટોકટીએ અત્યંત રૌદ્ર સ્વરૂપ ધારણ કર્યું છે. સંયુક્ત રાષ્ટ્ર (UN)ના પ્રવક્તાએ વૈશ્વિક સંસ્થાઓ (FAO, WFP અને UNICEF)ના અહેવાલને ટાંકીને જણાવ્યું છે કે, સુદાનમાં અત્યારે આશરે ૧.૯૫ કરોડ (૧૯.૫ મિલિયન) લોકો ગંભીર અન્ન અસુરક્ષા (ભૂખમરા)નો સામનો કરી રહ્યા છે. સ્થિતિ એટલી હદે વણસી ગઈ છે કે દેશના ૧૪ વિસ્તારો પર અત્યારે દુષ્કાળનું મોટું જોખમ તોળાઈ રહ્યું છે.
આફ્રિકાના યુદ્ધગ્રસ્ત દેશ સુદાનમાં માનવતાવાદી કટોકટીએ અત્યંત રૌદ્ર સ્વરૂપ ધારણ કર્યું છે. સંયુક્ત રાષ્ટ્ર (UN)ના પ્રવક્તાએ વૈશ્વિક સંસ્થાઓ (FAO, WFP અને UNICEF)ના અહેવાલને ટાંકીને જણાવ્યું છે કે, સુદાનમાં અત્યારે આશરે ૧.૯૫ કરોડ (૧૯.૫ મિલિયન) લોકો ગંભીર અન્ન અસુરક્ષા (ભૂખમરા)નો સામનો કરી રહ્યા છે. સ્થિતિ એટલી હદે વણસી ગઈ છે કે દેશના ૧૪ વિસ્તારો પર અત્યારે દુષ્કાળનું મોટું જોખમ તોળાઈ રહ્યું છે. UN ના ડેપ્યુટી સ્પોક્સપર્સન ફરહાન હકે મીડિયા બ્રીફિંગમાં ચેતવણી આપી હતી કે, જૂનથી સપ્ટેમ્બર મહિના વચ્ચેના ગાળામાં આ પરિસ્થિતિ વધુ ભયાનક અને કાબૂ બહાર થઈ શકે છે.
અહેવાલ મુજબ, સુદાનમાં યુદ્ધ અને હિંસાના કારણે આંતરરાષ્ટ્રીય મદદ પહોંચાડવી અત્યંત મુશ્કેલ બની ગઈ છે. માનવતાવાદી સંગઠનોએ દર મહિને ૪૮ લાખ લોકોને મદદ પહોંચાડવાનું લક્ષ્ય રાખ્યું હતું. પરંતુ, ભયાનક પરિસ્થિતિ અને અવરોધોના કારણે ફેબ્રુઆરી મહિનામાં માત્ર ૩૧.૩ લાખ લોકો સુધી જ અનાજ અને તબીબી સહાય પહોંચાડી શકાઈ છે. જરૂરિયાતના સ્કેલ સામે વર્તમાન માનવતાવાદી સહાય તદ્દન અપૂરતી સાબિત થઈ રહી છે.
ત્રણ મોટી વૈશ્વિક સંસ્થાઓની આક્રમક અપીલ
ખાદ્ય અને કૃષિ સંગઠન (FAO), વર્લ્ડ ફૂડ પ્રોગ્રામ (WFP) અને યુનિસેફ (UNICEF) એ સંયુક્ત નિવેદન જાહેર કરીને વૈશ્વિક સમુદાય સમક્ષ તાકીદની માંગણીઓ કરી છે:
૧. સુદાનમાં ચાલી રહેલી હિંસા અને સૈન્ય સંઘર્ષ તાત્કાલિક ધોરણે રોકવામાં આવે.
૨. આંતરરાષ્ટ્રીય સમુદાય કટોકટીના ધોરણે અનાજ, કટોકટીના પાક ઉત્પાદન, ન્યુટ્રિશન, આરોગ્ય અને પીવાના પાણીની સુવિધા માટે ફંડિંગ (આર્થિક મદદ) વધારે.
ગ્રાઉન્ડ ઝીરો પર UN નું ઓપરેશન ચાલુ,
યુદ્ધગ્રસ્ત દક્ષિણ-પશ્ચિમ સુદાન અને પાડોશી દેશ દક્ષિણ સુદાનમાં પણ ભૂખમરા રાહત માટે $૧૨ મિલિયન (૧.૨ કરોડ ડોલર) ફાળવવામાં આવ્યા છે. UN ની સંસ્થા ‘ઓચા’ (OCHA) ના જણાવ્યા અનુસાર, નોર્થ કોર્ડોફાન અને સાઉથ કોર્ડોફાન ક્ષેત્રમાં વિસ્થાપિત થયેલા અને આશ્રય લીધેલા લાખો લોકોને પીવાનું પાણી, બ્લેન્કેટ, મચ્છરદાની અને કેશ આસિસ્ટન્સ (આર્થિક સહાય) પહોંચાડવામાં આવી રહી છે. પરંતુ સતત થઈ રહેલી ગોળીબાર અને સૈન્ય લડાઈના કારણે નાગરિકો અને રાહત કર્મચારીઓનો જીવ સતત જોખમમાં મુકાઈ રહ્યો છે. સુદાન અત્યારે ઈતિહાસના સૌથી કાળા સમયમાંથી પસાર થઈ રહ્યું છે. જો દુનિયાના દેશોએ તાત્કાલિક હસ્તક્ષેપ કરીને ત્યાં અનાજ અને શાંતિ ન પહોંચાડી, તો ૨૧મી સદીની સૌથી મોટી માનવસર્જિત ભૂખમરાની દુર્ઘટના સુદાનમાં સર્જાઈ શકે છે.
વધુ વાંચો: અમેરિકા યુદ્ધ બંધ કરશે તો જ સ્ટ્રેટ ઓફ હોર્મૂઝમાંથી જહાજો સુરક્ષિત નીકળશે: ઈરાન