રિવોઈ ન્યૂઝ, 28 જુલાઈ, 2026 – સીજેપીના મામલો હજુ શાંત પડવાનું નામ નથી લેતો ત્યાં સોશિયલ મીડિયા ઉપર વધુ એક સંગઠનનો જન્મ થયો છે. રિઝર્વેશન (અનામત) હટાવો આંદોલન અર્થાત RHA નામે આ સંગઠન એકાએક વાયરલ થઈ રહ્યું છે.
આ સંગઠન ઈન્સ્ટાગ્રામ અને એક્સ (X) બંને સોશિયલ મીડિયા પ્લેટફોર્મ ઉપર ઉપલબ્ધ છે. જોકે તપાસ કરતાં જણાય છે કે આમ તો આ સંગઠન એક્સ ઉપર સપ્ટેમ્બર 2019થી અને ઈન્સ્ટાગ્રામ ઉપર પણ છેલ્લા થોડા મહિનાથી સક્રિય છે.
જોકે, આશ્ચર્યની વાત એ છે કે, જંતરમંતર ઉપર સીજેપીના ઉધામા દરમિયાન છાને ખૂણે અનામતનો મુદ્દો પણ ઉઠ્યો હતો અને શક્ય છે કે ત્યારબાદ RHAના ઈન્સ્ટા હેન્ડલ ઉપર ફોલોઅરની સંખ્યા વધી હોય. હાલ આજે મંગળવારે આ સમાચાર લખાય છે ત્યાં સુધીમાં તેના 5.6 મિલિયન ફોલોઅર બતાવે છે.
આરએચએ દ્વારા તેની ઈન્સ્ટા સ્ટોરીમાં જણાવ્યા અનુસાર, “અમે આ ચળવળને વિશ્વની સૌથી મોટી ચળવળ બનાવીશું અને તે પણ કોઈપણ પ્રકારની હિંસા વિના. દુનિયા નવા-પ્રગતિશીલ ભારતને જોઈ શકશે.”
ભારતમાં અનામત અર્થાત રિઝર્વેશન એ અત્યંત સંવેદનશીલ મુદ્દો છે અને તેને કારણે કેન્દ્ર સરકાર સહિત કેટલીક રાજ્ય સરકારોનાં પણ પતન થયાં છે.
આ ચળવળના સ્થાપક કોણ છે અને તેમની સાથે બીજા કોણ છે એ તો હજુ જાહેર થયું નથી. પરંતુ સંગઠન દ્વારા તેમના ઈન્સ્ટાગ્રામ ઉપર અજિત ભારતી સહિત અન્ય લોકો દ્વારા જ્યારે જ્યારે અનામત પ્રથાના વિરુદ્ધમાં બોલવામાં આવ્યું હોય તેના વીડિયો અપલોડ કરવામાં આવેલા છે.