નવી દિલ્હી, 31 જાન્યુઆરી 2026: સ્વર્ગસ્થ નેતા અજિત પવારના પત્ની અને એનસીપી વિધાનસભા પક્ષના નેતા સુનેત્રા પવારે લોકભવન ખાતે મહારાષ્ટ્રના નાયબ મુખ્યમંત્રી તરીકે શપથ લીધા. રાજ્યપાલ આચાર્ય દેવવ્રતે લોકભવન ખાતે શપથ લેવડાવ્યા.
આ સમારોહમાં મહારાષ્ટ્રના મુખ્યમંત્રી દેવેન્દ્ર ફડણવીસ, નાયબ મુખ્યમંત્રી એકનાથ શિંદે અને અન્ય ઘણા નેતાઓ હાજર રહ્યા હતા. શપથ ગ્રહણ સમારોહ દરમિયાન રાષ્ટ્રવાદી કોંગ્રેસ પાર્ટીના નેતાઓએ “અજીત દાદા, અમર રહેં” ના નારા લગાવ્યા.
અજિત પવારને શ્રદ્ધાંજલિ
અગાઉ, NCP વિધાનસભા પક્ષના નેતા તરીકે ચૂંટાયા બાદ, સુનેત્રા પવારે તેમના સ્વર્ગસ્થ પતિ, ભૂતપૂર્વ નાયબ મુખ્યમંત્રી અજિત પવારને શ્રદ્ધાંજલિ આપી હતી. મહારાષ્ટ્રના નાયબ મુખ્યમંત્રી તરીકે શપથ લેતા પહેલા તેમણે તેમના સત્તાવાર નિવાસસ્થાન, દેવગિરી બંગલામાં શ્રદ્ધાંજલિ અર્પણ કરી.
પીએમ મોદીએ અભિનંદન પાઠવ્યા
વડાપ્રધાનમંત્રીએ કહ્યું, “મહારાષ્ટ્રના નાયબ મુખ્યમંત્રી તરીકે કાર્યકાળ શરૂ કરવા બદલ સુનેત્રા પવારજીને ખૂબ ખૂબ અભિનંદન, આ જવાબદારી સંભાળનાર પ્રથમ મહિલા. મને વિશ્વાસ છે કે તેઓ રાજ્યના લોકોના કલ્યાણ માટે અથાક મહેનત કરશે અને સ્વર્ગસ્થ અજિતદાદા પવારના વિઝનને પૂર્ણ કરશે.”
2024ની લોકસભા ચૂંટણી સુધી, સુનેત્રા પવાર લો પ્રોફાઇલ રહી હતી. તે વર્ષની ચૂંટણીમાં, તેણીએ તેના પતિના પક્ષના ઉમેદવાર તરીકે બારામતીથી ચૂંટણી લડી હતી, પરંતુ તેણી પોતાની ભાભી અને હાલની NCP (SP) સાંસદ સુપ્રિયા સુલે સામે પ્રતિષ્ઠાની લડાઈ હારી ગઈ. સુનેત્રા પાછળથી રાજ્યસભામાં ચૂંટાઈ આવી.
મહારાષ્ટ્રના ભૂતપૂર્વ મંત્રી પદ્મસિંહ બાજીરાવ પાટિલની પુત્રી સુનેત્રા પવાર સામાજિક કાર્ય અને સહકારી ક્ષેત્રમાં પૃષ્ઠભૂમિ ધરાવે છે, જ્યાં પવાર પરિવારનું વર્ચસ્વ છે.